Azat Perýashev: Májilis saılaýyna usynǵan kandıdattarymyzdyń 60 paıyzy – jańa adamdar

ASTANA. QazAqparat – «Aq jol» demokratııalyq partııasynyń Májilis saılaýyna usynǵan partııalyq tizimindegi kandıdattardyń 60-dan astamy - jańa azamattar. Bul týraly partııa tóraǵasy Azat Perýashev Ortalyq saılaý komıssııasynda ótken brıfıngide aıtty, dep habarlaıdy QazAqparat tilshisi.

«Negizi bizdiń Májiliske usynatyn tizimimizde 54 úmitker bar. 54 úmitkerdiń ishinde zańnyń talaby boıynsha, 18 adam, ıaǵnı, kandıdattardyń 33,3 paıyzy - áıel áriptesterimiz, jastar jáne kemtar azamattar», - dedi ol.

Onyń aıtýyna qaraǵanda, búgin OSK tirkegen tizimde buǵan deıin «Aq jol» QDP atynan V, VI, VII shaqyrylymda bolǵan depýtattar da bar.

«Qazir naqty aıta almaımyn, biraq tizimdegi 20-dan astam adam jergilikti fılıal basshylary men ókilderinen irikteldi. Jańadan kelip qosylǵan úzeńgilester bar. Shamamen ózgergeni 60 paıyzdan kem emes. Tizimdegilerdiń 60 paıyzdan astamy – jańa azamattar», - dedi Azat Perýashev.

Eske salaıyq, búgin OSK «Aq joldyń» jáne JSDP-nyń Májilis saılaýyna usynǵan partııalyq tizimin tirkedi.