Arnaıy ekonomıkalyq aımaqtarda 41 myńnan astam jańa jumys oryndary ashylǵan
ASTANA. KAZINFORM - Qazaqstandaǵy arnaıy ekonomıkalyq aımaqtar (AEA) búginde ınvestıtsııa tartýǵa, jańa óndiristerdi iske qosýǵa jáne jumys oryndaryn ashýǵa múmkindik beretin memlekettik saıasattyń tıimdi quraldarynyń birine aınaldy, dep habarlaıdy QR Ónerkásip jáne qurylys mınıstrliginiń baspasóz qyzmeti.
Salyqtyq jáne kedendik jeńildikter túrindegi erekshe quqyqtyq rejımniń arqasynda AEA óńirlerdiń jáne jalpy elimizdiń ónerkásiptik áleýetin damytýǵa yqpal etip otyr.
«QazIndustry» qazaqstandyq ındýstrııa jáne eksport ortalyǵynyń arnaıy ekonomıkalyq jáne ındýstrııalyq aımaqtardy damytý dırektsııasynyń málimetinshe, qazirgi tańda respýblıka boıynsha 14 óńirde 17 AEA jumys isteıdi. Ótken jyly úsh jańa AEA quryldy. Olar – Atyraý oblysyndaǵy «Atyraý», Aqtóbe oblysyndaǵy «Aqtóbe» jáne Qyzylorda oblysyndaǵy «Qorqyt Ata» aımaqtary.
- Jańa arnaıy ekonomıkalyq aımaqtardyń qurylýy ınvestorlar qyzyǵýshylyǵynyń artyp kele jatqanyn jáne memleket tarapynan óńirlerdi damytýǵa serpin berýge baǵyttalǵan júıeli jumystyń jalǵasyp kele jatqanyn kórsetedi. Jalpy alǵanda, AEA aýmaqtarynda 558 ınvestıtsııalyq joba iske asyrylyp, 10,8 trln teńgeden astam ınvestıtsııa tartyldy jáne 41 myńnan astam jańa jumys orny ashyldy, – dep habarlady dırektsııa.
Aımaqtardyń mýltıplıkatıvtik tıimdiligi naqty kórsetkishter arqyly aıqyn kórinedi: ınfraqurylymǵa salynǵan árbir 1 teńge bıýdjet qarajatyna ónerkásipke 8,8 teńge kóleminde jeke ınvestıtsııa tartylyp, bıýdjetke 1,6 teńge salyq túsimi qamtamasyz etilgen. AEA qatysýshylary óndirgen ónimniń jalpy kólemi 13,9 trln teńgege jetse, eksport kólemi 1 trln teńgeden asty. Memlekettik bıýdjetke túsken salyq túsimderi 799,7 mlrd teńgeni qurady.
Osyǵan deıin Qazaqstanda AEA-larǵa jeńildik jasaý tetikteri ózgeretini týraly jazdyq.
