Azarenkomen ótetin jartylaı fınaldyq matchqa deıin qalypqa kelýim kerek – Elena Rybakına

MAIAMI. KAZINFORM — Qazaqstannyń birinshi, álemniń 4-raketkasy Elena Rybakına Maıamı (AQSh) WTA 1000 týrnıriniń jartylaı fınalynda Belarýs ókili Vıktorııa Azarenkomen ótetin match qarsańynda óz pikirin bildirdi.

WTA-nyń baspasóz qyzmetinen málim etkenindeı, E.Rybakına shırek fınalda álemniń 9-raketkasy, grekııalyq Marııa Sakkarımen ótken aýyr matchtan keıin qalypqa kelýdiń qıynǵa túsetinin aıtty.

«Azarenkomen oıyn jeńil bolady dep oılamaımyn, óıtkeni ár match saıyn óz babyma oralýǵa jaqyndaı túskenimmen, qalypqa kelý qıyn bolyp tur. Árıne, mundaı aýyr básekeler bolashaqta járdemdesedi, biraq bir kún demalys bolǵannyń ózinde qalypqa kelý ońaı emes. Matchtan keıin aıaǵymnyń aýyrǵanyn sezindim. Buǵan tózýge tyrysamyn. Qazir eń bastysy – qalypqa kelý. Ózimdi jaqsyraq sezinemin dep úmittenemin», - dedi E.Rybakına.

Rybakına men álemniń 32-raketkasy Azarenkonyń oıyny 28 naýryzǵa belgilengen. Ózara kezdesýlerde esep – 3:0, Elena alda tur. 

Eske sala keteıik, budan buryn Maıamı týrnırinde ıÝlııa Pýtıntsevanyń jartylaı fınalǵa shyǵa almaı qalǵanyn jazǵan bolatynbyz. Sondaı-aq Maıamıde Elena Rybakına álemniń 9-raketkasyn jeńip, jartylaı fınalǵa shyqty.