Azaptaýlarǵa qarsy zańnamany damytý jóninde dóńgelek ústel ótedi
ASTANA. 18 sáýir. QazAqparat - Erteń 19 sáýir kúni Parlament Májilisinde Zańnama jáne sot-quqyqtyq reforma komıteti men «Halyqaralyq túrmelik reforma» halyqaralyq uıymynyń Ortalyq Azııadaǵy ókildigi birlesip dóńgelek ústel ótkizedi.
Onda azaptaýlarǵa jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrlerine qarsy Qazaqstan Respýblıkasynyń zańnamasyn damytý máseleleri talqylanatyn bolady.
Sonymen qatar, shara barysynda «Qazaqstan Respýblıkasynyń keıbir zańnamalyq aktilerine azaptaýlardyń jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrleriniń aldyn alýǵa baǵyttalǵan ulttyq aldyn alý tetigin qurý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy da ótedi. Úkimet usynǵan atalǵan zań jobasyn Májilis búgingi otyrysynda óndiriske alǵan bolatyn.
Budan bólek, jıyn barysynda «Halyqaralyq túrmelik reforma» HQU Ortalyq Azııadaǵy ókildiginiń sarapshylarymen daıyndalǵan «Májbúrlep ustaý oryndarynda adam quqyqtarynyń saqtalýyna qoǵamdyq baqylaý týraly» zańdardyń jobalarynyń tusaý keseri kózdelip otyr.
