«Azaptaýǵa arnalǵan jertóleler»: QR ІІM jelidegi aqparatty joqqa shyǵardy

NUR-SULTAN. QazAqparat – Áleýmettik jelide Almatydaǵy LA-155/18 mekemesiniń tergeý ızolıatorynda ustalǵandardy azaptaıtyn jertóle bar ekendigi týraly aqparat taraýda. QR Іshki ister mınıstrligi bul málimettiń jalǵan ekenin aıtýda, dep habarlaıdy QazAqparat.

Onymen birge, tarap jatqan aqparatta Almaty qalasyndaǵy Qylmystyq-atqarý júıesi departamentine qaraıtyn LA-155/18 mekemesiniń bastyǵy A.Jumadıevtiń derekteri qosa berilgen.

«Osyǵan baılanysty, Qylmystyq-atqaý júıesi mekemesiniń aýmaǵynda eki qabatty ákimshilik ǵımarat jáne 4-5 qabattan turatyn 6 rejımdik korpýs, arnaıy kontıngentti ustaýǵa arnalǵan 230 kamera ornalasqanyn málimdeımiz.

Atalǵan rejımdik korpýstarda kommýnıkatsııalyq júıeler men jylytý toraptaryna arnalǵan jartylaı jertóle úı-jaılary bar. Bul úı-jaılarǵa kiretin esik korpýstardyń syrt jaǵynda ornalasqan. Al mekemege túskender rejımdik Tergeý ızolıatoryna kelgen adamdardyń bárin medıtsına qyzmetkerleri, sondaı-aq mekemeniń kezekshi aýysymy vıdeoǵa túsire otyryp qabyldaıdy.

Mekemege prokýratýra organdarynyń ókilderi, Adam quqyqtary jónindegi ýákil, sondaı-aq qoǵamdyq baqylaý uıymynyń músheleri udaıy baryp turady. Qylmystyq-atqarý júıesiniń qyzmeti Adamnyń qadir-qasıetin, ómiri men densaýlyǵynyń qaýipsizdigin, sottalǵandardyń jáne ózge de adamdardyń konstıtýtsııalyq quqyqtary men bostandyqtaryn qorǵaýǵa baǵyttalǵan», - dep jazylǵan mınıstrliktiń resmı málimetinde.

Іshki ister mınıstrligi kórineý jalǵan aqparat taratý áreketine QR Qylmystyq kodeksiniń 274-baby boıynsha qylmystyq jaýapkershilik kózdelgenin eskertýde.