Azaptaý ádisterin qoldanǵany úshin kúshtik organdardyń 39 qyzmetkeri qylmystyq jaýapqa tartylady

ASTANA. QazAqparat - Azaptaýdyń aldyn alý boıynsha mańyzdy qadamdardyń biri - polıtsııanyń penıtentsıarlyq mekemeleri men qyzmettik úı-jaılarynda úzdiksiz beınebaqylaýdy engizý, dep habarlaıdy QazAqparat Bas prokýratýraǵa silteme jasap.

Vedomstvo polıtsııa ǵımarattary men QAJK mekemelerin tekserý kezinde beınekameralarmen qamtylmaǵan 5812 ýchaske men úı-jaılardy jáne 900 jumys istemeı turǵan kamerany anyqtady.

«Prokýratýranyń usynysy boıynsha «Kórinbeıtin aımaqtardy» boldyrmaý úshin 3783 qosymsha beınekamera ornatyldy. Ǵımarattardy tolyq jaraqtandyrýdy aǵymdaǵy jyldyń sońyna deıin aıaqtaý josparlanýda.

Aýmaqtyq polıtsııa departamentteriniń, QAJK jáne ІІM ortalyq apparatynyń 19 basshysy tártiptik jaýapkershilikke tartyldy», - dep jazdy Bas prokýratýradan.

Osy jáne basqa da polıtsııa qyzmetkerleri arasynda azaptaýdyń aldyn alýdyń máseleleri Bas Prokýrordyń orynbasary Bolat Dembaevtyń qatysýymen Іshki ister mınıstrliginde ótken vedomstvoaralyq keńeste talqylanǵan. Onda qazirgi ýaqytta 88 azamatqa qatysty tergeýdiń ruqsat etilmegen ádisterin qoldanǵany úshin kúshtik organdarynyń 39 qyzmetkeri qylmystyq jaýaptylyqqa tartylatyny belgili boldy.

Mınıstrlik basshylyǵyna psıhologııalyq testileý ótkizý arqyly azaptaýdy qoldanýǵa beıim qyzmetkerlerdi aldyn ala anyqtaý usynyldy.

Azaptaýǵa qarsy keshendi sharalardy iske asyrý jalǵasýda.