Azan aıtýdan jarys ótti - Qyzylorda
ASTANA. 29 sáýir. QazAqparat - Qyzylorda qalasynda jaqynda "Azan aıtýdan jarys" uıymdastyrylyp, oǵan oblys boıynsha meshitterden 50 shákirt jınaldy,
dep habarlaıdy QMDB baspasóz qyzmeti.
Meshit jamaǵattary, Aýdan ımamdary men qala ımamdary, sondaı-aq oblys boıynsha meshit ustazdary da kelip atalmysh izgi sharaǵa qatysty. Bul saıysqa sarapshy retinde QMDB-nyń Qyzylorda oblysy boıynsha ókili, ortalyq "Aqmeshit-Syrdarııa" meshitiniń Bas ımamy Talǵat Omarov, oblystyq din isteri jónindegi departament bastyǵy Baqytjan Kamalov, Ortalyq "Aqmeshit-Syrdarııa" meshitiniń naıb ımamy Serik Berdiqojaev, Ortalyq "Aqmeshit-Syrdarııa" meshitiniń azanshysy - Muhtar Gadjıev, Qajylar qaýymdastyǵynyń tóraǵasy Nurlybek Nurseıitov, Jańaqorǵan aýdany ortalyq meshitiniń Bas ımamy Sadýlla Omarov qajy syndy kisiler ádil baǵalaryn berdi.
Azan jarysyna 8 jastan úlken qarttyq jasqa deıingi azandy janǵa jaǵymdy aıtar jandar qatysty.
Shákirtterdiń ishinen kóptegen daýysy asqaqtaǵan shákirtter arasynan ajyratyp úzdigin tańdap alý qıynǵa soqty. Degenmen 1 oryndy - Seıidalı Mahmýdov (Ortalyq "Aqmeshit-Syrdarııa" meshitiniń shákirti), 2 oryndy - Qaırat Dosmuratov (Ortalyq "Aqmeshit-Syrdarııa" meshitiniń shákirti) jáne Tolybaı Sembıev (Qarmaqshy aýdandyq meshitiniń shákirti), sondaı-aq 3 oryndy Bekzat Júsipuly (Qalalyq "Quddys ıshan" meshitiniń shákirti) men Bekzat Pyrzadaev (Qalalyq "Hazret Alı" meshitiniń shákirti) aldy. Basqa da qatysqandarǵa "Alǵys hattar" berildi.
«Azan» sózi arab tilinen tikeleı aýdarǵanda - «habar berý», «bildirý» degendi bildiredi. Al termındik maǵynasy paryz namazdarynyń ýaqyttaryn bildirý úshin aıtylatyn sózderdiń jıyntyǵy. Jalpy Islam tarıhynda alǵashqy azandy Medıne qalasynda haziret Bilál aıtqan.
Azan - barsha musylmandy bes ýaqyt namazǵa shaqyratyn dinı asa izgi amal. Azannyń ózindik shyǵý tarıhy men dinimizde alar orny bar. Kezinde asyl dinimiz qanat jaıa bastaǵan dáýirde musylmandardy qulshylyqqa shaqyratyn bir belgi, ádistiń qajettiligi týyndady. Sonda Paıǵambar (s.ǵ.s.) sahabalarmen aqyldasyp, namazǵa shaqyrý ádisin belgileý úshin májilis ótkizdi. Sol májiliste árkim ártúrli pikirler aıtty, Sahabalardyń keıbiri hrıstıandar sekildi qońyraý shalýdy usynsa, endi biri ıahýdıler tárizdi syrnaı tartaıyq degen oıyn ortaǵa salady. Tipti, otqa tabynatyn májýsıler sekildi namaz ýaqyty kirgende ot jaǵýdy usynǵandar da boldy. Biraq Paıǵambarymyz (s.ǵ.s.) bulardyń eshqaısysyn qabyldamady.
Osy tusta haziret Omardyń (r.a.) utymdy usynysy qabyldanyp, halyqty namazǵa shaqyrý úshin arnaıy bir adam taǵaıyndalatyn boldy. Bul jaýapty mindet Bilál ıbn Rabah esimdi sahabaǵa júkteledi.
Osydan kóp uzamaı-aq Abdýllah bın Záıd (r.a.) atty sahaba bir tús kóredi. Túsinde oǵan azannyń dál qazirgi túri úıretilip jatyr eken. Abdýllah tań atar atpastan qýanyshy qoınyna syımaı, kórgen túsin Paıǵambarymyzǵa (s.ǵ.s.) kelip, búge-shigesine deıin baıandady. Paıǵambar (s.ǵ.s) ony muqııat tyndap, azandy sol qalpynda aıtýdy laıyq kórdi de bul tústi halyqqa jetkizip, azan mátinin Bilál ıbn Rabahqa úıretti. Sol sátten bastap Bilál óziniń ásem daýsymen azan aıtyp, Mádına qalasynyń aspanyn jańǵyryqtyrdy.
