Azamattyq zańnamany jetildirýge baǵyttalǵan joba birinshi oqylymda maquldandy
ASTANA. Jeltoqsannyń 23-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine azamattyq zańnamany jetildirý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady,
dep habarlaıdy QazAqparat.
Atalǵan zań jobasynyń negizgi maqsaty Azamattyq kodekstiń normalaryn jetildirý, sondaı-aq ekonomıkany damytýdyń mańyzdy sharty retinde azamattyq zańnamanyń turaqtylyǵyn saqtaý bolyp tabylady. «Qujat jeke menshik ınstıtýttyń jáne kelisimsharttyq qatynastardy barynsha nyǵaıtýǵa baǵyttalady. Sonymen birge, zań jobasy Azamattyq kodekstiń ınstıtýttary men normalaryn jetildirýdi kózdeıdi. Bul rette kodekstiń jalpy jáne arnaıy normalarynyń qatynasyna jyljymaıtyn múlikke quqyqtardy tirkeý salasyndaǵy quqyqtyq kollızııalardy joıý, zańdy tulǵanyń jeke múliktik emes quqyqtarynyń buzylýyna moraldyq zııandy óndirip alý, kepildik jarna ınstıtýtyn engizý sekildi birshama ózgerister qarastyrylǵan. Budan basqa, birqatar qoldanystaǵy zańnamalarǵa redaktsııalyq sıpattaǵy túzetýler engizý kózdeledi», dedi baıandama jasaǵan QR Ádilet vıtse-mınıstri Muhtar Beketaev.
Qujatty ázirleýshilerdiń málimdeýinshe, Azamattyq kodeksti qoldaný boıynsha onyń keıbir olqylyqtary anyqtalǵan. Bul rette qazirgi zamanǵy qazaqstandyq qoǵamnyń jeke jáne zańdy tulǵalary arasyndaǵy barlyq múliktik jáne múliktik emes qatynastardy retteýdiń júıe qurýshy negizi retinde qyzmet etetin tujyrymdamasyn tolyq ári júıeli túrde kórsetý úshin Kodekske túzetýler engizý qajettigi pisip jetilgen. Budan basqa, kodekske qatysty keıbir zańnamalyq aktilerge de ilespe túzetýler usynylady.
Birinshi oqylymda maquldanǵan zań jobasy, ekinshi oqylymǵa ázirleý úshin Bas komıtetke tapsyryldy.
