«Azamattyq týraly» zańdy halyqaralyq standarttarǵa sáıkestendirý qajet - I. Adyrbekov
ASTANA. QazAqparat - «Azamattyq týraly» QR Zańyn halyqaralyq normalar men standarttarǵa sáıkestendirý qajet. Búgin QR Parlamenti Senatynda «Azamattyǵy bar jáne azamattyǵy joq tulǵalar» atty anyqtamalyqtyń tusa keseri barysynda senator Ikram Adyrbekov osylaı málim etti. Eske salaıyq, atalǵan anyqtamalyq Astanadaǵy BUU Bosqyndar jónindegi Joǵarǵy Komıssar basqarmasy ókildigimen birlese daıyndalǵan.
Senator Ikram Adyrbekovtiń aıtýynsha, bosqyndar turaqty turý jáne turaqty baspana alýy úshin zańnamalarǵa tıisti ózgerister engizý qajet.
«Turaqty turatyn bosqyndar mártebesi olar úshin jumysqa ornalasýǵa, áleýmettik kómekter alýǵa qol jetkizip, ortamen yqpaldasyp, sińisip ketýge septigin tıgizedi. Bosqyndar týraly áńgime bolǵanda «Azamattyq týraly» zańǵa da ózgerister engizý, ony halyqaralyq normalar men standarttarǵa sáıkestendirý qajettigine nazar aýdarýymyz kerek. Atap aıtqanda, zańnamadaǵy azamattyqtan aıyrýǵa ákep soqtyratyn erejelerdi joıýıymyz kerek, bul rette Qazaqstannyń aýmaǵynda dúnıege kelgen bosqyndar balalary jaıynda bolyp otyr», - dedi I.Adyrbekov.
