Azamattyq sektor aýyl ákimderin saılaý ıdeıasyn qoldaýy tıis - Memlekettik hatshy

NUR-SULTAN. QazAqparat - Azamattyq sektor aýyl ákimderin saılaý ıdeıasyn qoldaýy tıis. Bul týraly «Qoǵam jáne memleket: «Birgemiz» - 30 jyldyq seriktestik pen damý» atty IX Azamattyq forýmnyń jalpy otyrysynda QR Memlekettik hatshysy Qyrymbek Kósherbaev aıtty, dep habarlaıdy QazAqparat tilshisi.

«Elimizdiń úkimettik emes uıymdary jaýapty azamattyq qoǵamdy damytýdyń jáne saıası júıeni demokratııalandyrý shartynyń óte mańyzdy baǵyty retinde Memleket basshysynyń Joldaýynda belgilengen shynaıy jergilikti ózin ózi basqarýdy damytýǵa belsendi qatysýǵa tıis ekendigine senimdimiz. ÚEU-lar men azamattyq belsendiler jergilikti ózin ózi basqarý tujyrymdamasyn ázirleý jáne damytýǵa barynsha belsendi túrde qatysýy kerek. Kelesi jyldan bastap elimizde aýyldyq eldi mekenderdiń ákimderin saılaý bolady. Bul ıdeıanyń azamattyq sektordan qoldaýǵa ıe bolýy, alǵashqy kúnnen bastap-aq jergilikti ózin ózi basqarýdyń úzdik tájirıbesin júzege asyrýymyz, aýyldyq ákimderdiń naqty jaýapkershiligi men eseptiligin qamtamasyz etýimiz mańyzdy. Tórtinshi deńgeıli bıýdjetter tujyrymdamasynyń jumys isteýi, aýyldar men eldi mekender derbes bıýdjetke ıe bolýy, jergilikti jerde qalatyn salyq túrlerine durys arqa súıeı alýy mańyzdy», - dedi Memlekettik hatshy.

Sonymen qatar ol adamdar jergilikti bıýdjettiń qalaı qalyptasatyndyǵyn, olardyń oryndalýyn saılanǵan ákimnen qalaı talap etý kerektigin, ákimderdiń qalaı saılanatyndyǵyn, damý baǵdarlamalarynyń oryndalý barysyn baqylaýdy jaqsy túsinýi qajet ekendigin basa aıtty.

«Árbir turǵyn jergilikti bılikten durys jer saıasatyn, jumys berýshiden taza jalaqyny, medıtsınalyq jáne áleýmettik saqtandyrý qoryna tólemderdi talap etýi qajet. Óz aýylynyń, aýdanynyń, qalasynyń ómirin jaqsartý jaıynda oılaýy tıis», - dedi Qyrymbek Kósherbaev.