Azamattyq protsestik kodekske Ádildik qaǵıdaty engizilmek

ASTANA. QazAqparat – Sot protsesine qatysatyn adamdardyń quqyqtary men mindetteri teń dárejede saqtalsa, onda sot sheshimi ádil dep tanylady. Bul týraly Parlamenttiń qaraýyna engizilgen «QR keıbir zańnamalyq aktilerine protsestik zańnamany jetildirý jáne sot júıesin reformalaý máseleleri boıynsha ózgerister men tolyqtyrýlar engizý týraly» Zań jobasynda jazylǵan, dep habarlaıdy QazAqparat tilshisi.

Depýtattar talqylaýyna túsken qujatta QR Azamattyq protsestik kodeksine jańa 6-1-babyn (Ádildik qaǵıdaty) engizý usynylǵan.

«Eger isti qaraý jáne sheshý kezinde sot otyrysy barysynda belgilengen barlyq mán-jaılardy eskere otyryp, iske qatysatyn adamdardyń quqyqtary men mindetterin oǵan shamalas jáne teń bólý sharttary saqtalsa, sot sheshimi ádil dep tanylady», - delingen jańa redaktsııada.

Qujatqa qosymsha berligen túsindirmede atalǵan ózgeris sýdıalarǵa ádildik pen parasattylyq qaǵıdatyna súıenip, sheshim shyǵarýǵa baǵyttalǵany jazylǵan.

«QR Azamattyq protsestik kodeksi 17 qaǵıdatty qamtıdy. Olar sottyń zańdy sheshim qabyldaýyn qamtamasyz etedi. Biraq quqyq normalary múmkin jaǵdaılar men ómirlik jaǵdaılardyń alýan túrliligin eskere almaıdy. Keıbir jaǵdaılarda zań tikeleı uıǵarymǵa ıe, al basqalarynda sotqa óz qalaýy boıynsha sheshim qabyldaýǵa múmkindik beredi. Qalaı bolǵanda da, sottyń árbir qatysýshysy sottyń istiń barlyq nıýanstaryn túsinetinine jáne tek zańdy ǵana emes, sonymen birge ádil sheshim shyǵaratynyna senimdi bolýy tıis. Sýdıalarǵa, eger sheshim zańǵa negizdelgen bolsa jáne onyń sheginen shyqpasa sheshim qabyldaý kezinde «ádildik pen parasattylyq qaǵıdatyna» súıenýge eshteńe kedergi bolmaýy tıis», - dep túsinikteme berilgen jańa bapqa.