Azamattyq protsestik kodeks jobasy daýlardy sotqa deıin retteýge basymdyq beredi
ASTANA. QazAqparat - Jańa redaktsııadaǵy Azamattyq protsestik kodeks jobasy negizinen daýlardy sotqa deıingi retteý máselesine basymdyq bermek. Bul týraly búgin Senattyń Konstıtýtsııalyq zańnama, sot bıligi jáne quqyq qorǵaý organdary komıtetiniń keńeıtilgen otyrysy barysynda málim boldy.
Esterińizge sala keteıik, atalǵan kodeks jobasy Májiliste maquldanyp, Senattyń qaraýyna jiberilgen bolatyn.
Atap aıtqanda, jańa redaktsııadaǵy Azamattyq protsestik kodeks jobasy boıynsha isti sot talqylaýyna daıyndaý satysynda sheshiletin máseleler sheńberin keńeıtý arqyly isti daıyndaý satysyn jetildirý qarastyrylyp otyr. Bul rette isti sot talqylaýyna daıyndaý merzimi uzartylyp, sotqa qýynym aryzy qabyldanǵannan keıin sýdıa men protseske qatysýshylardyń áreketteri naqty reglamentteledi. Sonymen qatar, isti sot talqylaýyna daıyndaý barysy men birinshi satydaǵy sotta aıǵaqtardy usyný tártibi jaqsartylady. Buǵan qosa, daýlardy sotqa deıingi retteý máselesi keńeıtilip, azamattyq protsestegi taraptar ókildiginiń ınstıtýty jetildirilmek.
«Kodeks jobasynda biz bitimge kelý protsedýralaryn qarastyrdyq. Bul rette taraptar men advokattar oryn alǵan oqıǵa boıynsha sheshimder tabý joldaryn belsendi túrde qarastyratyn bolady. Sonymen qosa, máseleler, daýlar men janjaldar basqa tásildermen sheshimin tabady. Sot kelisimge kelýdiń zańǵa sáıkestigin jáne úshinshi tulǵalardyń quqyǵy buzylmaǵandyǵyn tekseredi», - dedi QR Joǵarǵy sotynyń sýdıasy Ulbolsyn Súleımenova.
Onyń aıtýyna qaraǵanda, endigi kúni jańa kodeks jobasyna sáıkes, azamattar sotqa sottasý úshin júginbeıdi, barlyq daýly máseleleriniń sheshim tabýyn talqylaý úshin dıalogtyq alań retinde júginetin bolady. «Bul rette, árıne, kóp máseleler negizinen týystar, kórshiler, eńbek ujymdary arasyndaǵy daýlarǵa baılanysty bolyp otyr. Eger sot protsestik zańnama aıasynda taraptardyń kelisimge kelýine kómek jasaıtyn bolsa, onda daýlasýshy taraptardyń qatary da azaıa túsedi dep oılaımyn», - dedi Joǵarǵy sot sýdıasy.
