Azamattyq pırotehnıkalyq zattardy saqtaý, esepke alý, paıdalaný, tasymaldaý, joıý, ákelý jáne áketý Erejeleri bekitildi

Qazaqstan Respýblıkasy Úkimetiniń qaýlysy №1303

2011 jylǵy 7 qarasha

Azamattyq pırotehnıkalyq zattar men olar qoldanylyp jasalǵan buıymdardy saqtaý, esepke alý, paıdalaný, tasymaldaý, joıý, ákelý, áketý qaǵıdalaryn bekitý týraly

«Qazaqstan Respýblıkasynyń ishki ister organdary týraly» Qazaqstan Respýblıkasynyń 1995 jylǵy 21 jeltoqsandaǵy Zańynyń 4-5-babynyń 3) tarmaqshasyna sáıkes Qazaqstan Respýblıka­synyń Úkimeti qaýly etedi:
1. Qosa berilip otyrǵan Azamattyq pırotehnıkalyq zattar men olar qoldanylyp jasalǵan buıymdardy saqtaý, esepke alý, paıdalaný, tasymaldaý, joıý, ákelý, áketý qaǵıdalary bekitilsin.
2. Osy qaýly alǵashqy resmı jarııalanǵanynan keıin kúntizbelik on kún ótken soń qoldanysqa engiziledi.

                                                                   Qazaqstan Respýblıkasynyń Premer-Mınıstri K.MÁSІMOV

 Qazaqstan Respýblıkasy Úkimetiniń 2011 jylǵy 7 qarashadaǵy №1303 qaýlysymen bekitilgen

Azamattyq pırotehnıkalyq zattar men olar qoldanylyp  jasalǵan buıymdardy saqtaý, esepke alý, paıdalaný,  tasymaldaý, joıý, ákelý, áketý qaǵıdalary

  1. Jalpy erejeler
1. Osy Azamattyq pırotehnıkalyq zattar men olar qoldanylyp jasalǵan buıymdardy saqtaý, esepke alý, paıdalaný, tasymaldaý, joıý, ákelý, áketý qaǵıdalary (budan ári - Qaǵıdalar) Qazaqstan Respýblıkasynyń «Іshki ister organdary týraly» 1995 jylǵy 21 jeltoqsandaǵy jáne «Lıtsenzııalaý týraly» 2007 jylǵy 11 qańtardaǵy zańdaryna sáıkes azamattyq pırotehnıkalyq zattar men olar qoldanylyp jasalǵan buıymdardy (budan ári - pırotehnıkalyq zattar men buıymdar) saqtaý, esepke alý, paıdalaný, tasymaldaý, joıý, ákelý, áketý tártibin belgileıdi.
2. Osy Qaǵıdalar kez kelgen qaýiptilik dárejesindegi óndiristik pırotehnıkalyq zattar men buıymdarǵa qoldanylmaıdy.
3. Azamattyq pırotehnıkalyq zattar men buıymdar qoldanylý kezinde áleýetti qaýiptiligi dárejesine qaraı 5 synypqa bólinedi:
1) І synyp - qaýipti faktorlar qatarynda soqqy beretin tolqyndar men jarylys kezinde jan-jaqqa ushatyn jaryqshaqtary joq, kınetıkalyq qozǵalys energııasy 0,5 Dj-dan aspaıtyn, buıymnan 0,25 m qashyqtyqtaǵy akýstıkalyq sáýlelenýi 125 DtsB-dan aspaıtyn, al qalǵan faktorlar boıynsha qaýipti aımaq radıýsy 0,5 m-den artyq emes buıymdar;
2) ІІ synyp - qaýipti faktorlar qatarynda soqqy beretin tolqyndar men jarylys kezinde jan-jaqqa ushatyn jaryqshaqtary joq, kınetıkalyq qozǵalys energııasy 5 Dj-dan aspaıtyn, buıymnan 2,5 m qashyqtyqtaǵy akýstıkalyq sáýlelenýi 140 DtsB-dan aspaıtyn, al qalǵan faktorlar boıynsha qaýipti aımaq radıýsy 5 m-den artyq emes buıymdar;
3) ІІІ synyp - qaýipti faktor qatarynda soqqy beretin tolqyndar men jarylys kezinde jan-jaqqa ushatyn jaryqshaqtary joq baǵyttalǵan qozǵalys kezindegi kınetıkalyq energııasy 5 Dj-dan astam, baǵyttalmaǵan qozǵalys kezinde 20 Dj-dan aspaıtyn, buıymnan 5 m qashyqtyqtaǵy akýstıkalyq sáýlelenýi 140 DtsB-dan artyq emes, al qalǵan faktorlar boıynsha qaýipti aımaq radıýsy ІІІ synyptyń 30 m-den artyq emes jáne ІІІa tómengi synyby 20 m-den aspaıtyn buıymdar;
4) IV synyp - qaýipti faktorlar qatarynda soqqy beretin tolqyndar joq, al qaýipti aımaq radıýsy qalǵan faktorlardyń eń az degende bireýi boıynsha 30 m-den astamdy quraıtyn buıymdar.
5) V synyp - І-IV synyptarǵa kirmegen ózge de pırotehnıkalyq zattar men buıymdar.
Azamattyq pırotehnıkalyq zattar men buıymdar maqsaty boıynsha pırotehnıkalyq zattar jáne turmystyq maqsattaǵy buıymdar (І-IІІ synyptar) men pırotehnıkalyq zattar jáne tehnıkalyq maqsattaǵy buıymdar (IV-V synyptar) bolyp bólinedi.

2. Azamattyq pırotehnıkalyq zattar men buıymdardy saqtaý jáne esepke alý tártibi

4. Zańdy jáne jeke tulǵalar osy Qaǵıdalarǵa 1-qosymshaǵa sáıkes daıyn ónimniń jáne olardyń quramdas komponentteriniń esebin, sondaı-aq osy Qaǵıdalarǵa 2-qosymshaǵa sáıkes kóterme saýda tutynýshylaryna daıyn ónimderdi bosatýdyń esebin júrgizedi.
5. Pırotehnıkalyq zattar men buıymdardy saqtaý Qazaqstan Respýblıkasynyń zańnamasyna sáıkes paıdalaný qujattamasynyń talaptary men órt (ónerkásip) qaýipsizdigi qaǵıdalaryna saı júrgiziledi jáne pırotehnıkalyq buıymdary bar oramalarǵa kún sáýlesiniń jáne atmosferalyq jaýyn-shashynnyń tikeleı túsýin boldyrmaıdy.
6. Tek arnaıy bólingen oryndarda jáne eskertý aqparaty bolǵan kezde ǵana jaramsyz bolǵan (aqaýǵa jatqyzylǵan) pırotehnıkalyq zattar men buıymdardy qoımalarda ýaqytsha saqtaýǵa ruqsat etiledi.
7. Azamattardyń jeke paıdalaný úshin satyp alynǵan, salmaǵy 333 kg brýttodan aspaıtyn pırotehnıkalyq zattar men buıymdar órt qaýipsizdigin qamtamasyz ete otyryp jáne tıisti pırotehnıkalyq zattar men buıymdardy qoldaný jónindegi nusqaýlyq boıynsha saqtalady.
8. Pırotehnıkalyq zattar men buıymdardy saqtaý kóterme saýda jáne shyǵys qoımalarynda shtabelder nemese aǵash tósemderde jáne bólshek saýda jelisi qoımalarynda saqtalady. Pırotehnıkalyq zattar men buıymdardy jabdyqtalǵan kólik quraldarynda nemese júrgiziletin jumystyń tehnologııalyq tsıkli sheginde paıdalaný oryndarynda ýaqytsha saqtaýǵa ruqsat etiledi.
9. Turmystyq maqsattaǵy pırotehnıkalyq zattar men buıymdardyń bólshek saýdasy, oǵan tikeleı kún sáýlesiniń jáne atomosferalyq jaýyn-shashynyń túsýin boldyrmaı ónimniń saqtalýyn qamtamasyz etetin dúkenderde, dúkenderdiń bólimderi men sektsııalarynda, pavılondar men dúńgirshekterde júrgiziledi. Saýda úı-jaılaryn pırotehnıkalyq zattarmen jáne buıymdarmen toltyrýdyń tikeleı normasy saýda úı-jaıynyń árbir 25 sharshy metrine brýtto boıynsha 1200 kg pırotehnıkalyq buıymdar men zattarǵa eseptelip belgilenedi. 333 kg aspaıtyn turmystyq pırotehnıkalyq zattar men buıymdardy 25 sharshy metrden az saýda úı-jaılarynda saqtaýdy jáne satýdy bir ýaqytta júrgizýge bolady.
10. Turmystyq maqsattaǵy pırotehnıkalyq zattar men buıymdardy satý júzege asyrylatyn úı-jaılardyń ornalasýy shtattan tys jaǵdaılar kezinde adamdardy shyǵarý úshin kedergi keltirmeýi tıis. Turmystyq maqsattaǵy pırotehnıkalyq zattar men buıymdardy satýǵa arnalǵan saýda úı-jaılary órt sıgnalızatsııasymen jáne órt sóndirýdiń bastapqy quraldarymen jabdyqtalady.
11. Saýda úı-jaılaryndaǵy turmystyq maqsattaǵy pırotehnıkalyq zattardyń úlgileri bar sóreler satyp alýshynyń pırotehnıkalyq zattar men buıymdardyń jazbalarymen tanysý múmkindigin qamtamasyz etedi jáne satyp alýshynyń buıymdy syrtaı kózben sholýynan basqa kez kelgen is-áreketterin boldyrmaıdy.
12. Turmystyq maqsattaǵy pırotehnıkalyq zattar men buıymdar jylytý júıesi aspaptarynan 0,5 m qashyqtyqta ornalasady. Turmystyq pırotehnıkalyq zattar men buıymdar bar úı-jaılarda mehanıkalyq jáne (nemese) jylý áreketterimen jasalatyn jumystarǵa jol berilmeıdi.
13. Ózine-ózi qyzmet kórsetý dúkenderiniń saýda úı-jaılarynda turmystyq pırotehnıkalyq zattar men buıymdardy satýdy tek mamandandyrylǵan sektsııalarda satýshy-konsýltant júrgizedi, satyp alýshylarǵa turmystyq maqsattaǵy pırotehnıkalyq buıymdardy tikeleı ustaýǵa bolmaıdy.
14. Buıymdy saqtaýǵa arnalǵan úı-jaıdyń eki jıyntyq kilti bolýy tıis. Bireýi buıymnyń saqtalýyna jaýapty adamda, ekinshisi - saqtaýǵa ruqsat berilgen uıym basshysynda arnaıy mór qoıylǵan penalda bolady.
Azamattyq pırotehnıkalyq zattar men buıymdardy saqtaýǵa arnalǵan úı-jaıdyń kiltterin ústeldiń ústine jáne basqa da bógde adamdarǵa qoljetimdi jerlerde qaldyrýǵa bolmaıdy.
15. Tehnıkalyq maqsattaǵy qaýiptiligi IV synyptyq azamattyq pırotehnıkalyq zattar men buıymdardy saqtaý qoımalary olardyń maqsatyna baılanysty turaqty (bazıstik), shyǵys jáne jyljymaly qoımalar bolyp bólinedi:
1) bazıstik qoımalar - buıymdy uzaq ýaqyt saqtaý úshin qyzmet etedi;
2) shyǵys qoımalary - buıymmen aǵymdaǵy qajettilikti qanaǵattandyrý úshin qyzmet etedi;
3) jyljymaly qoımalar - buıymdy qysqa ýaqyt saqtaý úshin qyzmet etedi.
Ónerkásip qaýipsizdigi salasyndaǵy ýákiletti organnyń kelisimi boıynsha azamattyq pırotehnıkalyq zattar men buıymdardy saqtaý úshin jarylǵysh materıaldardyń jumys istep turǵan qoımasyn paıdalanýǵa bolady.
16. Qaýiptiligi IV synyptyq azamattyq pırotehnıkalyq zattar men buıymdar Astana jáne Almaty qalalarynyń, oblystardyń jáne kóliktegi ishki ister departamentteri (budan ári - ІІD, KІІD) aýmaqtylyq boıynsha bergen qaýiptiligi IV synyptyq azamattyq pırotehnıkalyq zattar men buıymdardy satyp alýǵa lıtsenzııasy bar basqa da zańdy jáne jeke tulǵalarǵa olardy saqtaý orny boıynsha qoımalardan satylady.
17. Azamattyq pırotehnıkalyq zattar men olar qoldanylyp jasalǵan buıymdardy tolyqtyrý normasy:
1) bazıstik qoımalar úshin - 200 000 kg-nan;
2) shyǵys qoımalary úshin - 5 000 kg-nan;
3) saýda uıymdarynyń (dúkenderdiń) qoıma úı-jaılary úshin - 5 000 kg-nan aspaýy tıis.
18. Saqtaý oryndaryn jeldetý úshin qulyppen jabylatyn torly metall esikter, al terezeler men jeldetkish qaqpaqtaryna metall torlar men torshalar ornatylady. Torly esikter men torlardyń kózderi kólemi 150 mm h 150 mm aspaýy, tor shybyǵynyń qalyńdyǵy 10 mm kem bolmaýy tıis.
19. Azamattyq pırotehnıkalyq zattar men buıymdardy turaqty jáne ýaqytsha saqtaýǵa arnalǵan jumys istep turǵan jáne jańadan paıdalanýǵa berilgen barlyq qoımalar aýmaqtyq ishki ister organdarynda tirkelýi tıis.
20. Árbir saqtaý qoımalarynda azamattyq pırotehnıkalyq zattar men buıymdardy saqtaýǵa aýmaqtyq ishki ister organdary bergen ruqsat etilgen sanynan aspaıtyn mólsherde saqtaýǵa bolady.
Árbir bazıstik jáne shyǵys qoımalarynyń pasporty bolý tıis, onyń bir danasy qoımada saqtalady.
21. Barlyq qoımalar buıymnyń túri men tolyqtyrý normasyna baılanysty qaýipsiz ara qashyqtyqta ornalasýy tıis.
Qoımalardyń arasyndaǵy jeke ǵımarattardyń ara qashyqtyǵy qulaǵan kúıde 100 metrden (budan ári - m), qulamaǵan kúıde 50 m kem bolmaýy tıis.
Bazıstik qoımalardyń jekelegen saqtaý oryndarynyń arasyndaǵy ara qashyqtyq qulaǵan kúıde 200 m. kem bolmaýy tıis.
Shyǵys qoımalary turǵyn úılerden, feıerverk kórsetetin alańdardan jáne adamdardyń kóp jınalatyn oryndarynan qaýipsiz ara qashyqtyqta, biraq 100 metrden jaqyn emes aralyqta ornalasýy tıis.
Barlyq qoımalar:
1) aýdandyq mańyzdan tómen emes tas joldan, keme júzetin ózender men arnalardan, turǵyn úı qurylystarynan jeke turǵan qoımaǵa aparatyn joldardy qospaǵanda, temir jolǵa bólingen jolaqtar shekarasynan - 400 m;
2) stantsııalyq ǵımarattarǵa, qoımalar men basqa da stantsııalyq qurylystarǵa bólingen jolaqtar shekarasynan - 1000 m;
3) halqynyń sany 10000-ǵa deıin jáne 10000 adamnan asatyn kentter men basqa da eldi mekender aýmaqtary shekarasynan - tıisinshe 800 m jáne 1000 m;
4) qoımaǵa tıesili emes basqa óndiristik ǵımarattar men qurylystardan - 1500 m kem emes qashyqtyqta ornalasýy qajet.
22. Turaqty jáne shyǵys qoımalardyń aýmaǵy bıiktigi 2,5 m kem emes tikenekti symmen qorshalýy tıis.
23. Barlyq saqtaý oryndary janbaıtyn materıaldan jasalǵan, bir qabatty, jylytylmaıtyn bolýy tıis. Saqtaý oryndarynyń qabyrǵalary men tóbesi aqtalǵan bolýy tıis.
Qoımalardyń edenderi óndiristik ǵımarattardyń eden qurylǵylaryna arnalǵan tehnıkalyq sharttarǵa sáıkes ushqyn shyǵarýdy boldyrmaıtyn, janbaıtyn materıaldan jasalýy tıis.
24. Saqtaý oryndarynyń kólemine qaraı eki shyǵatyn esigi bolýy tıis. Uzyndyǵy 10 m kem qoımanyń bir shyǵatyn esigi bolýy múmkin.
Saqtaý ornyna kiretin esikter syrtqa qaraı ashylýy tıis. Kún jaqqa qaraıtyn terezeniń áınekteri kúńgirt bolýy nemese aq boıaýmen boıalýy tıis.
Jasandy jaryqtandyrý syrtta bolýy tıis. Qoıma úı-jaılarynda kezekshi jaryqtandyrý, sondaı-aq gaz plıtalaryn, elektrlik-qyzdyrǵysh aspaptardy paıdalaný jáne shtepseldi qosqyshtardy ornatýǵa bolmaıdy.
25. Qoımalarda elektr jabdyqtar qoldaný aıaqtalǵannan keıin, táýliktiń túngi ýaqytynda toqtan ajyratylýy tıis. Elektr quralyn óshirýge arnalǵan apparattar qoıma úı-jaıynan tys jerde, órtenbeıtin materıaldan jasalǵan qabyrǵada nemese jeke turǵan baǵandaǵy shkafta nemese plombalaýǵa jáne qulyppen jabýǵa arnalǵan qurylǵysy bar taýashada ornalasýy tıis.
26. Bir saqtaý ornynda azamattyq pırotehnıkalyq zattar men buıymdardyń birneshe túrin saqtaý kezinde buıymdardyń jarylys qaýipsizdigi qaǵıdalaryna sáıkes birlesip saqtaý qaǵıdalary qatań saqtalýy tıis.
Buıym oramalaryn shtabelderde nemese sórelerde saqtaý qajet. Shtabelderde nemese sórelerde feıerverk buıymdary bar jáshikterdi saqtaý kezinde olar partııalarmen qoıylýy tıis.
Shtabelderde saqtaýǵa arnalǵan buıymdary bar aǵash jáshikter sórelerde biriniń ústine biri qaqpaqtaryn joǵary qaratyp qoıylýy kerek, tómengi qatarlardyń astyna aýa almasýdy qamtamasyz etý úshin taqtaılardan tósem jasaý qajet.
Ár shtabelderde jáne sórelerdiń tekshesinde buıym ataýy nemese ındeksi, partııa nómiri, oryndar sany, kelip túsken kúni kórsetilgen kórsetkish bolýy tıis.
27. Buıymdardy shtabelderde jáne sórelerde ornalastyrý olardyń jeldetý, shtabelden (sórelerden) olardy alý, qaraý múmkindigin qamtamasyz etýi tıis. Shtabelderdi ornalastyrý kezinde olardyń arasyndaǵy ótý joly: qaraý úshin - 0,7 m, júkti tıeý jáne túsirý úshin - 1,5 m, kireberistegi qabyrǵa jaǵynan shtabeldiń sońyna deıingi qashyqtyq - keminde 1,25 m jáne shtabelderden artqy jáne búıirlik qabyrǵalarǵa deıin - 0,7 m bolýy kerek. Shtabelderdiń bıiktigi 2,5 m, eni - 5 m bolýy kerek.
Shtabelderdiń joǵarǵy teksheleriniń bıiktigi edennen 1,65 m aspaıtyn, tómengi qabattyń edenge deıingi qashyqtyǵy - keminde 0,15 m jáne joǵary teksheden tóbege deıin - keminde 1 m bolýy tıis.
Sórelerdi tolyqtyrý kezinde olar tómen túsip jáne qısaıyp ketpeıtindeı túrde qurylýy tıis. Saqtaý qoımalaryndaǵy sórelerdiń barlyq bólikteri jáne bir-birimen metall qoldanylmaı tıekpen jáne synalanyp qosylýy, ári bekitilýi tıis. Sóre taqtaılaryn shegelerdiń bastaryn 0,5 sm\ge kirgize qaǵyp, bekitýge jáne oıyq jerlerine shpatlevka jaǵýǵa bolady.
28. Saqtaý oryndarynda júkti qabyldaý jáne berý táýliktiń jaryq kezinde júrgizedi. Qajet bolǵan jaǵdaıda bul jumystardy syrtqy jasandy jaryqtandyrýmen júrgizýge bolady.
Pırotehnıkalyq zattar men buıymdardyń saqtaý oryndarynda (qoımalarynda) júk tıeý-túsirý jumystaryna arnalǵan mehanızmder jarylǵyshtan qorǵalǵan kúıde oryndalǵan bolýy, al ishki janý qozǵaltqyshtarynyń paıdalanyp shyǵarylǵan gazdardyń beıtaraptandyrýshylary jáne ushqyn óshirgishteri bolýy tıis.
29. Osy Qaǵıdalarǵa 1-qosymshaǵa sáıkes qoımada daıyn ónimdi bosatýdy esepke alý jýrnalyn júrgizý qajet, ol nómirlengen, tigilgen, ishki ister organdarynyń «Lıtsenzııalaý-ruqsat berý júıesi» degen bederi bar mórimen mórlengen bolýy tıis.
Ónimniń árbir túrin jekeleı esepke alý qajet. Jýrnaldaǵy jazbalar kiris-shyǵys qujattardyń negizinde júkti alǵan nemese bergen kezde dereý júrgizilýi kerek.
30. Saqtaý orny men qoıma aýmaǵyn taza ustaý kerek, synǵan ydystardy, bógde jáne janǵysh materıaldardy saqtaýǵa bolmaıdy. Qoıma ǵımaratynyń kirý joldaryn, órt sóndirý, sý kózderiniń, sondaı-aq órtke qarsy múkkamaldar men jabdyqtarǵa barý joldary únemi bos bolýy tıis.
Qoımalar arasyndaǵy qaýipsiz qashyqtyqtardy qandaı da bir materıaldar, jabdyqtar men basqa da zattardy saqtaý úshin paıdalanýǵa bolmaıdy.
Buıymdardy tasymaldaý úshin qoıma aýmaǵyna azamattyq pırotehnıkalyq zattar men buıymdardy tasymaldaý kóligine ruqsat kýáligi bar kólikke ǵana ruqsat etiledi.
Adamdarǵa pırotehnıkalyq zattar men buıymdardy satyp alýmen, saqtaýmen, esepke alýmen, tasymaldaýmen, paıdalanýmen tikeleı baılanysty jumystarǵa ruqsat berý adamdarǵa jarylǵysh materıaldaryna ruqsat berilgen talaptarmen sáıkes júrgiziledi.
31. Pırotehnıkalyq zattar men buıymdardy saqtaý ishki ister organynyń ruqsaty negizinde júzege asyrylady.
32. Jeke jáne zańdy tulǵalar pırotehnıkalyq zattar men buıymdardyń saqtaý ruqsatyn berý úshin qyzmet kórsetetin aýmaǵynda qoıma ornalasqan ishki ister organyna:
1) saqtaýǵa jatatyn pırotehnıkalyq zattar men buıymdardyń ataýy men sanyn (salmaǵyn, mólsherin), saqtaý úshin jaýapty adamnyń tegin, atyn, ákesiniń atyn, jeke kýáliginiń nemese pasportynyń serııasy men nómirin kórsete otyryp, jeke jáne zańdy tulǵalardyń qoldaýhatyn;
2) ótinish berýshiniń pırotehnıkalyq zattar men buıymdardy ázirleý jáne (nemese) óndirý jáne (nemese) satý jáne (nemese) paıdalaný quqyǵyna lıtsenzııasyń kóshirmesi;
3) órt qaýipsizdigi qaǵıdalarynyń talaptaryna sáıkes keletin jáne esepke alynǵan ónimniń saqtalýyn, ony qatań esepke alýdy jáne bar-joǵyn tekserý múmkindigin qamtamasyz etetin daıyn pırotehnıkalyq ónimdi ótkizýge arnalǵan úı-jaı men olardy saqtaýǵa arnalǵan qoımalardyń menshik quqyǵyn rastaıtyn qujat kóshirmelerin usynady.
Pırotehnıkalyq zattar men buıymdardyń saqtaý úshin jeke menshik qoıma bolmaǵan jaǵdaıda, ónerkásiptik qaýipsizdik salasyndaǵy ýákiletti organ jáne ishki ister organdary bergen, olardy paıdalanýǵa jáne saqtaýǵa arnalǵan tıisti kýálikteri men ruqsattary bar úshinshi tulǵadan saqtaýǵa ne qoımany (qoımalardy) jalǵa alýǵa arnalǵan sharttyń (sharttardyń) kóshirmesin usynǵan kezde kelisedi.
33. Pırotehnıkalyq zattar men buıymdardy saqtaýǵa arnalǵan ruqsatty ishki ister organdary:
1) jeke jáne zańdy tulǵa ótinish bildirgen kezde - ony qaraý úshin ózge sýbektilerden, laýazymdy adamdardan aqparat alý ne sol jerge bara otyryp, tekserý talap etilmegen kezde kúntizbelik on bes kún;
2) jeke jáne zańdy tulǵa ótinish bildirgen kezde - ony qaraý úshin ózge sýbektilerden, laýazymdy tulǵalardan aqparat alý ne sol jerge shyǵa otyryp, tekserý talap etilgen kezde kúntizbelik otyz kún ishinde beredi.
34. Pırotehnıkalyq zattar men buıymdardyń saqtaýǵa arnalǵan ruqsat úsh jyldyq merzimge beriledi.
35. Pırotehnıkalyq zattar men buıymdardy saqtaýǵa arnalǵan ruqsattyń merzimi aıaqtalǵan kezde ol uzartýǵa jatpaıdy.
Pırotehnıkalyq zattar men buıymdardy saqtaýǵa arnalǵan ruqsatty joǵaltqan jaǵdaıda ruqsatty bergen ishki ister organyn dereý jazbasha habardar etken jáne ruqsattyń joǵalǵany týraly buqaralyq aqparat quraldaryna habarlandyrý bergen kezde telnusqa beriledi.
36. Ruqsattyń jaramdylyq merziminiń ótýi, jeke jáne zańdy tulǵanyń atyna berilgen ruqsat, onyń ataýy, jaýapty adamnyń meken-jaıynyń, saqtaý orny men qoıma syıymdylyǵynyń ózgerýi ruqsattardy qaıta resimdeý úshin negizder bolyp tabylady.

3. Azamattyq pırotehnıkalyq zattar men buıymdardy
paıdalaný (feıerverkter kórsetý) tártibi
37. Qazaqstan Respýblıkasynyń aýmaǵynda qaýiptiligi IV synyptyq azamattyq pırotehnıkalyq zattar men buıymdardy paıdalanýdy (kórsetýdi) Qazaqstan Respýblıkasynyń Іshki ister mınıstrligi, olardy paıdalanýǵa bergen lıtsenzııasy bar jeke jáne zańdy tulǵalar júzege asyrady.
38. Feıerverkterdi qoǵamdyq-mádenı kópshilik is-sharalarda qoldaný tek aýmaqtyq ishki ister organymen kelisilgen, jumysty júrgizýge quqyǵy bar qujattamalar bekitilgennen keıin jergilikti ákimshiliktiń ruqsatymen feıerverkterdi kórsetýdi júzege asyratyn jeke jáne zańdy tulǵalarǵa ruqsat etiledi.
Bul rette azamattyq pırotehnıkalyq zattar men buıymdarǵa tehnıkalyq qujattamalar, ornalas­tyrý-jospary, buıymdardy tasymaldaý úshin arnaıy jabdyqtalǵan kólik kelisýge usynylady.
39. Osy jumystardyń qaýipsizdigin qamtamasyz etý úshin standarttardy, órtke qarsy tehnıkalyq qaýipsizdik normalary men qaǵıdalaryn basshylyqqa alý qajet.
40. Mádenı-kópshilik jáne buqaralyq is-sharalardy ótkizý kezinde feıerverkter kórsetý úshin uıymdastyrýshylar jergilikti atqarýshy organǵa is-shara ótkizýge deıin keminde 10 kún buryn qoldaýhatpen ótinish bildiredi.
Qoldaýhatta mynadaı málimetter:
1) meken-jaıy jáne baılanys telefondarynyń nómirleri kórsetilgen sharany uıymdastyrýshy uıymnyń ataýy jáne meken-jaıy, uıymdastyrýshylar men olardyń ýákiletti adamdarynyń qyzmeti, olardyń tegi, aty, ákesiniń aty;
2) is-sharanyń ataýy men maqsaty;
3) is-sharanyń, onyń ishinde feıerverk kórsetýdiń bastalýy jáne aıaqtalý kúni, orny men ýaqyty;
4) is-sharaǵa qatysýshylardyń boljamdy sany;
5) azamattyq pırotehnıkalyq buıymdardy eksponattaýǵa, satyp alýǵa quqyq beretin lıtsenzııalardy, olardy saqtaý men tasymaldaýǵa arnalǵan ruqsattardy qosa bere otyryp, feıerverk kórsetýdi uıymdastyryp jatqan jeke jáne zańdy tulǵa týraly málimet;
6) feıerverk kólemi, paıdalanylatyn feıerverk buıymdarynyń sıpaty men júrgizilý tártibi;
7) feıerverk basshysy feıerverk kórsetýge tartylatyn personal týraly málimetter jáne feıerverkke basshylyq etý men júrgizý quqyǵyn rastaıtyn qujattardyń kóshirmeleri;
8) qoǵamdyq tártipti qorǵaýdy jáne órtke qarsy qaýipsizdikti qamtamasyz etý úshin jumyldyrylǵan qajetti kúshter men quraldar kórsetiledi.
41. Feıerverkti daıyndaý jáne paıdalaný kezeńinde buıymdardy qysqa ýaqytqa saqtaý kezinde turǵyn úılerden, qoǵamdyq qurylystardan, adamdar kóp jınalatyn oryndarynan qaýipsiz qashyqtyqtaǵy jyljymaly qoımalarda (aýmaqtyq ishki ister organdarynyń jol polıtsııasynyń kelisimi boıynsha arnaıy jabdyqtalǵan kólikter) júzege asyrylady. Qoımaǵa kúzet qoıylýy tıis.
42. Feıerverkti uıymdastyratyn adamdar feıerverk kórsetilimderinde qaýipsizdikti, personaldy qorǵaý sharalary men feıerverk buıymdarynan saqtalýyn qamtamasyz etedi, ishki ister organdarymen kúzet is-sharalaryn kelisedi. Feıerverkter qurylǵylary ornalastyrylatyn oryndardy kúzetý ishki ister organdary men osy is-sharany ótkizetin uıymǵa júkteledi.
43. Feıerverkter kórsetiletin oryndy tańdaý men kelisý feıerverk buıymdaryn qoldaný boljanǵan qaýipti aımaqtardyń radıýsyn, jer bederin, meteojaǵdaılardy, jaqyn ornalasqan obektilerdiń sıpatyn, qaýipti aımaqty kúzetý senimdiligi men kórsetilim qaýipsizdigine yqpal etetin basqa da faktorlardy eskere otyryp, júrgizilýi tıis.
Qaýiptiligi IV synypty azamattyq pırotehnıkalyq zattarmen jáne buıymdarymen feıerverkterdi kórsetý orny ákimshilik bekitken jáne joǵary turǵan uıymmen kelisilgen syzbaǵa sáıkes órtenetin qurylystardan, otyn qoımalarynan, pisken dándi daqyldar nemese pishen alqaptarynan, sabandar, qylqandy ormandardan, elektr jelilerinen keminde 500 m qashyqtyqta, órtenbeıtin qurylystardan keminde 50 m qashyqtyqta bolýy tıis.
Feıerverk kórsetý úshin eń yńǵaıly oryn úlken sý qoımalarynyń jaǵalaýlary bolyp tabylady. Qurylǵylardy iske qosý orny kórermenderdiń iske qosý alańynan 100 m qashyqtyqta, jel jaǵynda bolatyndaı túrde tańdalýy kerek.
44. Feıerverkter kórsetý úshin tyıym salynatyn oryndarǵa:
1) azamattardyń qaýipsizdigin qamtamasyz etpeıtin aýmaqtar, ǵımarattar, qurylymdar, qurylystar;
2) qaýipti jáne zııandy óndiristerge jaqyn ornalasqan aýmaqtar men obektiler, sondaı-aq kólik toraptary (kópirler, ótpe joldar, avtomobıl joldarynyń bolý jolaqtary, temir jol munaı-gaz qubyrlary jáne joǵary voltty elektr taratý jelileri, órt jáne asa qaýipti jarylǵysh obektileri);
3) aýrýhana ǵımarattary men balalar mekemelerine tikeleı jaqyn ornalasqan aýmaqtar;
4) rýhanı-mádenı mańyzy bar obektilerdiń aýmaǵy, tarıhı jáne mádenı eskertkishter, zırattar men ǵıbadat etý qurylystary, qoryqtar, qaýmaldar, ulttyq saıabaqtar men taýap etý oryndary obektileriniń aýmaqtary jatady.
35. Feıerverk tek mekemeniń (kásiporynnyń) jaýapty adamnyń kúzet daıyndyǵy men órtke qarsy is-sharalardyń oryndalýy týraly maman-pırotehnıktiń jýrnalyna qol qoıǵannan keıin ǵana bastalady.
46. Feıerverkterdi kórsetý kezinde tek belgilengen tártipte attestatsııalanǵan iske qosý quralyn paıdalanýǵa ruqsat etiledi. Feıerverkter kórsetý qoldanylatyn azamattyq pırotehnıkalyq zattar men buıymdar jáne iske qosý quraly oǵan qasa beriletin paıdalaný jónindegi nusqaýlyqqa qatań sáıkestikte qoldanylýy tıis. Paıdalaný boıynsha nusqaýlyqty saqtaýǵa feıerverkter kórsetýdi ótkizetin uıym jaýapty bolady.
47. Azamattyq pırotehnıkalyq zattar men buıymdardyń urlanýy nemese joǵalýy faktisi týraly aýmaqtyq ishki ister organdaryna dereý habarlaý qajet.
48. Feıerverk júrgiziletin alańdarda:
1) temeki shegýge jáne ot jaǵýǵa;
2) mas kúıde jumys isteýge;
3) feıerverk quraldaryn kúzetýsiz qaldyrýǵa qatań tyıym salynady.
49. Feıerverk aıaqtalǵannan keıin janbaı qalǵan buıymdar men elementterdi jınaý maqsatynda kórsetý sharasyn uıymdastyrýshylar feıerverk júrgizilgen alańdy muqııat qaraıdy.
50. Feıerverk júrgiziletin alańdy kúzetý barlyq jumystar aıaqtalǵannan keıin feıerverk basshysynyń kelisimimen ǵana toqtatylady.
Qaýipti aımaqty kúzetý men órtke qarsy is-sharalar feıerverk aıaqtalǵannan keıin jáne feıerverkterdi eksponattaýǵa jaýapty adamdardyń tekserýinen keıin ǵana toqtatylady.
51. Feıerverk aıaqtalǵannan keıin onyń ótkizilgendigi jáne sóndirlirý týraly akti úsh danada jasalyp, oǵan feıerverk basshysy men feıerverkke tapsyrys berýshi ókil qol qoıady.

4. Azamattyq pırotehnıkalyq zattar men buıymdardy tasymaldaý tártibi
52. Pırotehnıkalyq zattar men buıymdardy tasymaldaý úderisinde mynadaı qaýipsizdik talaptary oryndalady:
1) pırotehnıkalyq zattar men buıymdardy tasymaldaý olardyń qasıetteriniń saqtalýyn qamtamasyz etedi jáne ónimniń qaýiptilik synybyn eskere otyryp, kólik túrine qoldanynatyn júk tasymaldaý qaǵıdalaryna sáıkes júzege asyrylady;
2) pırotehnıkalyq zattar men buıymdar oralǵan, tańbalanǵan, manıpýlıatsııa belgileri qoıylǵan, taýarǵa qajetti ilespe qujattary bar jáne tasymaldaý kezinde olardyń tutynýshylyq qasıetteri saqtalǵan jáne paıdalaný boıynsha qujattama talaptaryna sáıkestik qamtamasyz etilgen kezde ǵana olardy tasymaldaýǵa ruqsat etiledi;
3) azamattardyń jeke paıdalanýy úshin turmystyq maqsattaǵy pırotehnıkalyq buıymdardy pırotehnıkalyq ónimderdi paıdalaný qujattarynyń talaptaryn saqtaı otyryp, brýtto salmaǵy boıyn­sha 333 kg aspaıtyn mólsherde tasymaldaýǵa ruqsat etiledi;
4) kólik qaýiptiliginiń 1.4 kishi toby bar pırotehnıkalyq zattar men buıymdardy tasymaldaý salmaǵy jaǵynan shekteýsiz, júk jóneltýshi nemese júk qabyldaýshy ázirlegen baǵyt boıynsha tasymaldaý qaǵıdalarynyń talaptaryn saqtaı otyryp, qaýipti júkti tasymaldaýǵa ruqsat etilgendigi týraly kýáligi jáne qaýipti júk tasymaldaýǵa ruqsaty bar kólik júrgizýshisi bir ǵana kólik quralymen tasymaldaýdy júzege asyrady. Júk jóneltýshi nemese júkti qabyldap alýshy júkpen ilesip júretin jaýapty adamdy bóledi, bul fýnktsııany tasymaldanatyn pırotehnıkalyq zattar men buıymdardyń qasıetteri men erekshelikterin biletin júrgizýshi oryndaýy múmkin. Tasymaldaý baǵytyn kelisýdiń jáne tasymaldaýǵa ruqsat resimdeýdiń qajeti joq.
53. Kólik qaýipsizdiginiń 1.4-ten joǵary kishi toby bar IV synypty pırotehnıkalyq zattar men buıymdardy, sondaı-aq, V synypty pırotehnıkalyq buıymdardy tasymaldaý:
1) Keden odaǵyna múshe jeke memleket aýmaǵy boıynsha Keden odaǵyna tıisti múshe memleket aýmaǵynda qoldanystaǵy qaýipti júkti tasymaldaý qaǵıdalaryna sáıkes;
2) Keden odaǵyna múshe kem degende eki memlekettiń nemese úshinshi eldiń aýmaǵy boıynsha halyq­aralyq joldarda qaýipti júkti tasymaldaý týraly (JQJT) Eýropalyq kelisimge sáıkes júrgiziledi.
54. Azamattyq pırotehnıkalyq zattar men buıymdardy temir jol kóligimen tasymaldaý 1996 jylǵy 5 sáýirdegi dostastyq elderiniń qatysýshy memleketteri Temir jol kóligi boıynsha keńestiń 15-otyrysynda bekitilgen temir jol arqyly qaýipti júkterdi tasymaldaý qaǵıdalaryna sáıkes júzege asyrylady.
55. Azamattyq pırotehnıkalyq zattar men buıymdardy ártúrli kólik túrlerimen tasymaldaý kezinde olardyń senimdi kúzetilýi qamtamasyz etiledi.
56. Tasymaldanatyn júkti shaıqalǵan jáne qatty qozǵalǵan kezde onyń qulaýy, úıkelýi, bir-birine jáne kólik qabyrǵasyna soǵylýy bolmaıtyndaı túrde ornalastyrylýy tıis.
57. Barar jolda jartylaı túsirilýge jatatyn ónimdi tasymaldaý kezinde olardyń árbir partııa­synyń árqaısysy bir-birinen bólek qoıylyp, qalǵan júkter óz oryndarynan qozǵalmaıtyndaı túrde bekitilýi kerek.

5. Azamattyq pırotehnıkalyq zattar men buıymdardy joıý tártibi
58. Tutynýshylyq qasıetin joǵaltqan jáne (nemese) tehnıkalyq reglament talaptaryna sáıkes kelmeıtin pırotehnıkalyq zattar men buıymdar kádege jaratylýy tıis, onyń ishinde:
1) elektrlik - tutandyrǵyshy istemeı qalǵan;
2) quramy tutanbaı qalǵan;
3) buıym tolyq kúıde jumys jasamaǵan;
4) elektrlik - tutanǵysh symdarynyń úzilgen;
5) jaramdylyq merzimi aıaqtalǵan;
6) sáıkestendirý belgileri joq (joǵalǵan);
7) aqaýlyq belgileri anyqtalǵan;
8) kontrafaktilik pırotehnıkalyq buıymdar.
59. Pırotehnıkalyq zattar men buıymdardy kádege jaratý úderisinde mynadaı qaýipsizdik talaptary oryndalady:
1) pırotehnıkalyq zattar men buıymdar tutynýshylar órt qaýipsizdigi jáne jarylǵysh qaýipsizdigi sharalary talaptaryn saqtaı otyryp, paıdalaný qujattarynda nemese buıymdardaǵy tańbalaý belgileri túrindegi kórsetilgen talaptarǵa sáıkes joıýǵa jatady;
2) pırotehnıkalyq zattar men buıymdardy óndirýge ruqsat etý qujaty bar uıymdar Qazaqstan Respýblıkasynyń zańnamasyna sáıkes tehnologııalyq nusqaýlyqqa (tehnologııalyq úderiske) saı pırotehnıkalyq zattar men buıymdardy kádege jaratýdy, sondaı-aq óndiris jáne tutyný qaldyqtarynan kosarly ónim (shıkizat, materıaldar, jınaqtaý elementterin) alý maqsatynda júzege asyrady.
60. Barlyq jumys istemeı qalǵan buıymdar men elementer jetkizýshi zaýyt ázirlegen naqty buıymdardy paıdalaný nusqaýlyǵyna sáıkes joıýǵa jatady.
61. Jaramsyz pırotehnıkalyq zattar men buıymdardy joıý ishki ister organy ókiliniń qatysýymen júrgiziledi.

6. Azamattyq pırotehnıkalyq zattar men buıymdardy Qazaqstan Respýblıkasyna ákelý jáne Qazaqstan Respýblıkasynan áketý tártibi
62. Azamattyq pırotehnıkalyq zattar men buıymdardy Qazaqstan Respýblıkasyna ákelý jáne Qazaqstan Respýblıkasynan áketý Qazaqstan Respýblıkasy Іshki ister mınıstrligimen kelisiletin Qazaqstan Respýblıkasy Indýstrııa jáne jańa tehnologııalar mınıstrliginiń lıtsenzııasy boıynsha mynadaı qujattardyń negizinde júzege asyrylady:
1) jeke nemese zańdy tulǵa basshysynyń qoldaýhaty, onda ákelinetin jáne áketetin azamattyq pırotehnıkalyq zattar men buıymdardyń ataýy men sany (salmaǵy); ákeletin (áketetin) jaýapty adamnyń tegi, aty, ákesiniń aty, jeke kýáliginiń nemese pasportynyń nómiri men serııasy; kórsetilgen buıymdar áketiletin jáne ákelinetin memleket; ákelý nemese áketý júzege asyrylatyn keden organy kórsetiledi;
2) ereksheligi qosa berilgen, azamattyq pırotehnıkalyq zattar men buıymdardy jetkizýge arnalǵan kelisimshart kóshirmesi;
3) Qazaqstan Respýblıkasy Indýstrııa jáne jańa tehnologııalar mınıstrligi bergen ımporttaýshynyń (sońǵy paıdalanýshynyń) kepildik mindetteriniń kóshirmesi, (eksporttaýshy eldiń zańnamasynda osyndaı qujatty usyný kózdelgen jaǵdaıda);
4) azamattyq pırotehnıkalyq zattar men buıymdardy satyp alýǵa aýmaqtyq ishki ister organy bergen lıtsenzııanyń kóshirmesi;
5) azamattyq pırotehnıkalyq zattar men buıymdardy saqtaýǵa aýmaqtyq ishki ister organdary bergen ruqsattyn kóshirmesi;
6) lıtsenzııalanatyn qyzmet túrlerimen aınalysý quqyǵyna Qazaqstan Respýblıkasynyń Іshki ister mınıstrligi bergen lıtsenzııanyń kóshirmesi.
63. Azamattyq pırotehnıkalyq zattar men buıymdardy avtomobıl kóligimen ákelý (áketý) kezinde aýmaqtyq jol polıtsııasy organy bergen, kólik quralyn qaýipti júkterdi tasymaldaýǵa jiberý týraly ruqsat, júkterdi tasymaldaý quqyǵyna lıtsenzııa jáne tasymaldaý ruqsaty usynylady.
64. Qazaqstan Respýblıkasynyń zańnamasyna sáıkes Іshki ister mınıstrligi ımportqa (eksportqa) arnalǵan lıtsenzııalardy kelisedi nemese ımportqa (eksportqa) lıtsenzııaǵa kelisýden bas tartady.