Azamattyq qyzmetshilerdiń jalaqysyn kóterý úshin Úkimet qaýlysy ázirlenbek

NUR-SULTAN. QazAqparat – Azamattyq qyzmetshilerdiń jekelegen sanatynyń jalaqysyn kezeń-kezeńimen arttyrý úshin Úkimet qaýlysynyń jobasy ázirlenedi. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Serik Shápkenov aıtty, dep habarlaıdy QazAqparat tilshisi.

«Memleket basshysy jarııa etken bastamalarǵa sáıkes eńbekaqy tóleýdi arttyrý boıynsha kelesi is-sharalar qabyldanady. Birinshi, 2022-2024 jyldarǵa arnalǵan respýblıkalyq bıýdjet týraly zań jobasyna 2022 jylǵy 1 qańtardan bastap eń tómengi jalaqyny 60 myń teńge mólsherinde belgileý týraly norma engiziledi. Atalǵan is-shara ekonomıkanyń barlyq salasynda jumys istetin 1 mln 650 myń jaldamaly qyzmetkerdiń aqshalaı tabysynyń artýyna alyp keledi. Bul sondaı-aq razrıadaralyq biliktilik júıesin eskere otyryp, basqa da qyzmetkerlerdiń kiristerin arttyrýǵa múmkindik beredi», - dedi mınıstr.

Onyń aıtýynsha, ekinshiden, azamattyq qyzmetshilerdiń jekelegen sanatynyń jalaqysyn kezeń-kezeńimen arttyrý úshin Úkimet qaýlysynyń jobasy ázirlenedi.

«Nátıjesinde 2022 jyldan bastap olardyń jalaqysy ortasha eseppen jyl saıyn 20 paıyzǵa artyp, 2025 jylǵa qaraı eki esege ulǵaıady. Eń tómengi jalaqy kelesi jyldan bastap 49 myńnan 60 myń teńgege deıin nemese 22 paıyzǵa ósedi», – dedi mınıstr.

Sonymen qatar Memleket basshysynyń áleýmettik masyldyqty tómendetýge jáne muqtaj jandarǵa kómek kórsetýge qatysty tapsyrmalary ázirlenip jatqan Áleýmettik kodekste eskeriletinin aıtty.

Eske salsaq, 1 qyrkúıek kúni QR Prezıdenti Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty halyqqa Joldaýyn jarııalady. Joldaýdyń tolyq mátini myna jerde.