Azamattyq qorǵaý týraly zań jobasy maquldandy - Májilis
ASTANA. 19 maýsym. QazAqparat - Búgin Májiliste palata depýtattary «Azamattyq qorǵaý týraly» zań jobasyn birinshi oqylymda maquldady.
Tótenshe jaǵdaılar mınıstri Vladımır Bojkonyń aıtýyna qaraǵanda, zań jobasynyń qajettiligi apattarǵa qarsy is-qımyldyń jańa ıdeologııasyn jasaý, tótenshe jaǵdaılar, Azamattyq qorǵanys, ónerkásiptik jáne órt qaýipsizdigi, memlekettik materıaldyq rezervter men apattyq qutqarý qyzmetteri salasynda qaǵıdatty jańa tujyrymdama qalyptastyrýǵa negizdeledi. Budan bólek, qujatta óskeleń ýaqyt talaptaryna sáıkes, azamattyq qorǵaý salasy men memlekettik basqarý organdary arasyndaǵy ýákilettilikti belgileý men onyń arajigin ajyratý qarastyrylady.
«Túptep kelgende atalǵan zań jobasy zor ekonomıkalyq zalalǵa soqtyratyn tabıǵı aýytqýlar sanynyń ósýine, el aýmaǵynyń basym bóliginiń seısmoqaýipti aımaqtarda ornalasýyna, sondaı-aq Qazaqstannyń ónerkásiptik áleýetiniń, sonyń ishinde qaýipti tehnologııaly óndirister esebinen ósýine jaýap bolyp tabylady. Al onyń barlyǵy bizdiń basty mindetimizge - halyqty qorǵaýǵa baǵyttalady», - deıdi V. Bojko.
Toqtala ketetin jaıt, zań jobasymen «azamattyq qorǵaý» atty jańa túsinik engizilgen. Bul Qazaqstan halqyn, nysandary men aýmaǵyn qorǵaýǵa, azamattyq qorǵanys sharalaryn qosa alǵanda tótenshe jaǵdaılar aımaǵynda qalǵan turǵyndarǵa medıtsınalyq jáne psıhologııalyq kómek kórsetýge baǵyttalǵan jalpy memlekettik sharalar keshenin qamtıdy. «Zań jobasyn qabyldaý elimizdiń barlyq aýmaǵynda azamattyq qorǵaýdy uıymdastyrý máseleleri boıynsha biryńǵaı quqyqtyq, uıymdyq, aqparattyq jáne ádistemelik óristi qalyptastyrýǵa, sondaı-aq uzaq merzimge arnalǵan apattarǵa qarsy biryńǵaı is-qımyl ıdeologııasyn jasaýǵa septigin tıgizedi», - deıdi mınıstr.
