«Azamattyq qorǵanys týraly» zań jobasy Senatqa joldanady - vıtse-mınıstr V.Petrov
ASTANA. 18 qarasha. QazAqparat - Jaqyn arada «Azamattyq qorǵanys týraly» zań jobasy Senattyń qaraýyna joldanady. Bul týraly búgin QR Parlament Senatynyń Halyqaralyq qatynastar, qorǵanys jáne qaýipsizdik komıtetiniń ókilderimen bolǵan kezdesýde QR Tótenshe jaǵdaılar vıtse-mınıstri Valerıı Petrov málim etti.
Aıta keteıik, atalǵan zań jobasy birinshi oqylymda «Aq jol» partııasynyń synyna ushyraǵan bolatyn. Fraktsııa depýtattary qujattyń kóptegen kemshin tustaryn taýyp, onyń barlyǵyn ózgertýdi talap etti. Máselen, quzyretti mınıstrlik tótenshe jaǵdaılardy joıý jumysyna jaýapty emes bolǵan. Ol tek halyqty habarlandyryp, tótenshe jaǵdaılardyń zardabymen ǵana kúresýge tıis edi. Sondyqtan depýtattar tótenshe jaǵdaılardy joıýdy mınıstrliktiń tikeleı mindeti retinde engizý qajet dep tapty. Budan basqa, onda jekemenshik órt sóndirý qyzmeti, halyqty habarlandyrý júıesine qatysty máseleler bar. Jalpy, birinshi oqylymda «Azamattyq qorǵanys týraly» zań jobasyna 1500 ózgertýler men tolyqtyrýlar engizildi. Qujattyń ózi 107 betten turady.
QR Tótenshe jaǵdaılar vıtse-mınıstri V.Petrovtyń aıtýynsha, aǵymdaǵy jyly 19 maýsym kúni jańa zań Parlament Májilisiniń birinshi oqylymynda maquldanǵan bolatyn. «Jaqyn arada ol ekinshi oqylymnan ótedi dep senemiz. Qazir birqatar ózgerister bar. Biz ony Úkimetpen kelisip, búgin onyń bárin bitiretin bolamyz. Sodan qujat ekinshi oqylymǵa joldanady. Al keıin onyń Senattyń qaraýyna túsetinin eskere otyryp, men sizderden, qurmetti depýtattar, atalǵan zań jobasyna qoldaý bildirýińizdi suraımyn», - dep atap kórsetti V.Petrov.
