Azamattyq qorǵanys akademııasyn qurý qajet - Tótenshe jaǵdaılar mınıstri
ASTANA. Jeltoqsannyń 14-i. QazAqparat /Qanat Mámetqazyuly/ - Kókshetaý tehnıkalyq ınstıtýty bazasynda Azamattyq qorǵanys akademııasyn qurý qajet. Búgin QR Parlamenti Májilisinde ótken Úkimet saǵatynda QR Tótenshe jaǵdaılar mınıstri Vladımır Bojko osylaı málim etti,
dep habarlaıdy QazAqparat.
Mınıstrdiń aıtýynsha, barlyq sanattaǵy qutqarýshylar men azamattyq qorǵanys bólimshelerindegi qyzmetkerlerdiń apattyq-qutqarý jáne basqa da jaǵdaılardaǵy sharalary barysynda biliktiligin jetildirý ózekti máseleniń biri bolyp tabylady. «Bul rette eń aldymen Kókshetaý tehnıkalyq ınstıtýty bazasynda Azamattyq qorǵanys akademııasyn qurý asa mańyzdy bolyp otyr. Bundaı akademııany qurý týraly Memleket basshysynyń jetekshiligimen ótken Qaýipsizdik keńesiniń otyrysynda másele kóterilgen bolatyn», dedi mınıstr.
Mınıstrdiń aıtýynsha, mamandardy daıarlaý men qaıta daıarlaýsyz tótenshe jaǵdaılar bólimshelerindegi jaǵdaıdy jaqsartý múmkin bolmaıdy.
Sonymen birge, V. Bojko Astana qalasynda ortalyq avıatsııalyq baza salý máselesine de toqtalyp ótti. Onyń aıtýynsha, bundaı baza tótenshe jaǵdaılar oryn alǵan aýmaqqa kúshter men quraldardy jetkizýdi jedeldetýge járdem beredi. «Qazir bundaı avıabazanyń barlyǵy Almaty qalasynda ornalasqan. Eger respýblıka ortalyǵynda bir oqys jaǵdaı qalyptasyp, oǵan arnaıy tikushaq qajet etilse, onyń kelýine de ájeptáýir ýaqyt ketetin bolyp otyr», dedi mınıstr.
