Azamattyq qoǵamnyń bılik organdaryna degen senimin arttyrý kóp jaǵdaıda tártiptik keńesterdiń jumys sapasyna baılanysty - Aqordadaǵy kezdesý

ASTANA. 19 jeltoqsan. QazAqparat - Búgin Aqordada Memlekettik hatshy Marat Tájınniń tóraǵalyǵymen Qazaqstan Respýblıkasy Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń otyrysy ótti.

Bul týraly QR Prezıdentiniń baspasóz qyzmetinen habarlady.

Otyrys barysynda Memlekettik qyzmet isteri agenttiginiń tártiptik keńesteri jumysynyń tıimdiligin arttyrý jónindegi sharalar, sondaı-aq jergilikti atqarýshy organdarǵa transfertter túrinde bólingen bıýdjettik qarajattardy paıdalaný jónindegi máseleler talqylandy.

Memlekettik qyzmet júıesindegi jemqorlyq quqyq buzýshylyqtardyń der kezinde aldyn alý jáne jolyn kesý, jalpy alǵanda, azamattyq qoǵamnyń bılik organdaryna degen senimin arttyrý kóp jaǵdaıda tártiptik keńesterdiń jumys sapasyna baılanysty bolatyny atap ótildi.

Sonymen birge Komıssııa jergilikti atqarýshy organdarǵa transfertter túrinde bólingen bıýdjettik qarajattardy paıdalaný tıimdiligi máselelerin qarady.

Maqsatty transfertter kólemin sapasyz josparlaý, bıýdjettik baǵdarlamalar ákimshileri tarapynan tıisti baqylaýdyń bolmaýy anyqtalǵan buzýshylyqtardyń negizgi sebebi bolyp tabylady.

Otyrys barysynda Memlekettik qyzmet isteri agenttiginiń tóraǵasy Á.Baımenovtiń, Premer-Mınıstrdiń orynbasary - Qarjy mınıstri B.Sultanovtyń, Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy R.Túsipbekovtiń, sondaı-aq Respýblıkalyq bıýdjettiń atqarylýyn baqylaý jónindegi esep komıteti men Bas prokýratýra ókilderiniń esepteri tyńdaldy.