Azamattyq qoǵamdy damytýdyń 2025 jylǵa deıingi tujyrymdamasy qabyldanady

NUR-SULTAN. QazAqparat – Búgin elordada «Memleket basshysynyń Joldaýyn júzege asyrýdaǵy Úkimettik emes uıymdardyń rólin arttyrý» atty sarapshylar qaýymdastyǵynyń dıalogtyq otyrysy ótip jatyr, dep habarlaıdy QazAqparat tilshisi.

«Memleket basshysynyń Joldaýy zamanǵa saı, azamattyq qoǵamnyń suranystaryna jaýap beretin strategııalyq baǵyttardy aıqyndaıtyn mańyzdy qujat. Sebebi ol el azamattarynyń ál-aýqatyn arttyrýmen baılanysty ózekti máselelerdi sheshýge baǵyttalǵan. Elbasynyń kemel saıasatynyń arqasynda Qazaqstanda áleýmettik memlekettiń berik negizi qalandy. Al Memleket basshysy Elbasy saıasatyn jalǵastyra otyryp qazaqstandyqtardy tıisti áleýmettik qajettiliktermen qamtamasyz etetin jańa bastamalardy jarııalady. Joldaýda qazirgi áleýmettik-ekonomıkalyq jaǵdaıǵa jan-jaqty tereń taldaý jasaǵan jáne ony oryndaý boıynsha naqty mindetter qoıylyp otyr. Memleket basshysy eń ózekti degen máseleler boıynsha tek belgili bir aýdıtorııalarmen ǵana emes, búkil Qazaqstan halqymen dıalog qurý kerektigin aıtty», - dedi QR Aqparat jáne qoǵamdyq damý vıtse-mınıstri Danııar Esın.

Onyń aıtýynsha, prezıdent óz Joldaýy elimizdiń saıası qujaty ǵana emes, aldymen halyqtyń áleýetin kóterýge baǵyttalǵan mańyzdy qujat.

«Joldaýda aıtylǵan taǵy bir mańyzdy dúnıe ol halyqty estıtin, onyń pikirine qulaq túretin bıliktiń bolýy. Osy oraıda arnaıy «Ulttyq keńes» qurylyp, óz jumysyn bastady. Atap aıtqanda, úsh baǵytta jumys júrip jatyr. Ol saıası, áleýmettik jáne ekonomıkalyq jańǵyrý. Bul degenimiz, belsendi azamattyq qoǵam qurý úshin úkimettik emes uıymdardyń bedelin arttyrýdyń qajettilikke aınalǵandyǵy. Bul rette ózderińizben birlesip azamattyq qoǵamdy damytýdyń 2025 jylǵa deıingi tujyrymdasyn qabyldaýymyz kerek», - dedi ol.

Aıtýly sharaǵa, qoǵamdyq keńestiń músheleri, azamattyq qoǵam ınstıtýtynyń ókilderi, sarapshylar men memlekettik organdardyń ókilderi qatysýda.