Azamattyq qoǵamdy ashyq dıalogqa tartý qajet - nemis ǵalymy

ASTANA. QazAqparat - Azamattyq qoǵamdy ǵalamdyq protsesterge, halyqaralyq jáne ulttyq deńgeıdegi ashyq dıalog formatyna tartý qajet. Bul týraly búgin Global Challenges Summit-2018 forýmy aıasynda ótken «Azamattyq qoǵamnyń bolashaǵy. Jańa azamattyq belsendilik» atty sessııada «Hertie» memlekettik basqarý joǵary mektebiniń prezıdenti, áleýmettanýshy Helmýt Anheıer aıtty, dep habarlaıdy QazAqparat tilshisi.

Germanııa áleýmettaný ǵylymdarynyń professory óz sózinde memleket pen azamattyq qoǵam ınstıtýttary arasyndaǵy ózara senimniń mańyzdylyǵyn atap ótti.

«Kóptegen elderde Úkimet azamattyq qoǵamdy oppozıtsııa nemese qoǵamǵa qarsy yqpal etetin uıym retinde kóredi. Biraq, meniń oıymsha olar ózderiniń qoǵamdaǵy rólin túsine otyryp tıimdi yqpaldasa alady», - dedi Helmýt Anhaıer.  

Nemis sarapshysynyń aıtýynsha, azamattyq qoǵamnyń bolashaqtaǵy damýyn boljaý qıynǵa soǵady.  Birikken Ulttar Uıymy azamattyq qoǵammen ózara is-qımyl salasyna sońǵy ret 15-20 jyl buryn sholý jasaǵan. Sondyqtan halyqaralyq deńgeıde ÚEU-lerdiń damýyna baqylaý júrgizý qajet. 

«Búginde biz álemde bolyp jatqan túrli geosaıasattyń yqpalyn baqylaý ústindemiz. Atap aıtqanda, Qytaı ekonomıkasynyń ósýi, Taıaý Shyǵystaǵy turaqsyzdyq jaǵdaıy, kóshi-qon daǵdarysy, jahandyq jylyný, klımattyń ózgerýi oryn alýda. Sondyqtan qazir azamattyq qoǵamdy ǵalamdyq protsesterge, halyqaralyq jáne ulttyq deńgeıdegi ashyq dıalog formatyna tartý qajet», - dedi Helmýt Anheıer.

Aıta keteıik, Helmýt Anhaıer azamattyq qoǵam salasyndaǵy jetekshi sarapshylardyń biri, álemniń birqatar tanymal jýrnaldarynda  450-den astam ǵylymı maqalalary jarııalanǵan. Onyń kitaptary saıasattaný jáne áleýmettaný ǵylymdary salasynda úzdik dep tanylǵan.

Foto: primeminister.kz