Azamattyq is júrgizý barysynda advokatýranyń róli kúsheıe túsedi
ASTANA. QazAqparat - Azamattyq is júrgizý protsesi barysynda advokatýranyń róli kúsheıe túsedi. Bul týraly búgin Májiliste jańa redaktsııadaǵy Azamattyq is-júrgizý kodeksi jobasynyń tanystyrylmy barysynda palatanyń Zańnama jáne sot-quqyqtyq reforma komıtetiniń tóraǵasy Rahmet Muqashev málim etti.
Komıtet basshysynyń aıtýynsha, jańa joba zaman talabynan týyndaıtyn úderisterdi retteýge baǵyttalady. «Kodeks jobasynyń jańalyqtaryna kelsek, birinshiden, sotta qaraýǵa isterdi daıyndaýdyń merzimi uzartylyp otyr. Osyǵan baılanysty sotqa qýyný shaǵymdary qabyldanǵannan soń sottar men basqa da protsesske qatysatyn taraptardyń áreketteri naqty reglamentteledi. Ekinshiden, sotqa deıingi talqylaý barysynda barlyq qatysýshylar aıǵaqtaryn usynýy tıis bolady. Eger olar sotqa deıin aıǵaq pen dálelderin usyna almasa, onda sotta isti qaraý barysynda usynýlary tıis. Tek erekshe jaǵdaılarda ǵana apellıatsııalyq ınstantsııalarda aıǵaqtardy usynýǵa ruqsat beriledi», - deıdi Rahmet Muqashev.
Budan bólek, onyń sózine qaraǵanda azamattyq is júrgizý barysyndaǵy advokatýranyń róli kúsheıtile túsedi. Máselen, advokattar memlekettik organdardan, qoǵamdyq birlestikterden, zańdy tulǵalardan anyqtamalar nemese basqa da qujattar suratýǵa quqyly bolady, sondaı-aq qorǵaýshylardyń zańgerlik kómek úshin basqa da áreketterge quqyǵy qarastyrylady.
Sonymen qatar, azamattyq is júrgizý barysynda medıatsııa, ıaǵnı bitimgershilik ınstıtýty da nyǵaıtylady. Taraptardyń ótinish hattary negizinde bitimgerlik kelisimderi de jasalatyny kózdelip otyr. «Jańalyqtardyń biri - «partısıpatıvtik protsedýra» engizý. Bul rette advokattar bitimgerlik kelisimge mindetti túrde járdemdesýleri kerek bolady. Sonymen qatar, sotqa shaǵymdaný barysynda tólengen memlekettik baj salyǵy qaıtarylady», - deıdi R. Muqashev.
Bunymen qosa, komıtet basshysy protsessýaldyq quqyqtar men mindetterdi asyra paıdalanýdyń aldyn alý úshin qatań sharalar qarastyrylatynyn da alǵa tartty.
