Azamattyq forým: Almatynyń ÚEU ókilderine granttar tabystaldy

ALMATY. QazAqparat - Búgin Almatyda «Qoǵam jáne memleket: «Birgemiz» seriktestik pen damýdyń 30 jyly» atty IX Azamattyq forýmynyń qorytyndysy boıynsha Almaty ákiminiń orynbasary Erjan Babaqumarov úkimettik emes uıymdardyń ókilderine marapattar tabystady, dep habarlaıdy QazAqparat tilshisi.

Azamattyq forým – bul QR Aqparat jáne qoǵamdyq damý mınıstrliginiń qoldaýymen 2003 jyldan beri ár eki jyl saıyn uıymdastyrylatyn dástúrli alań. Bıyl Azamattyq forým onlaın-formatta ótkizildi.

Forým delegattary sarapshylyq, pikirtalas jáne oqytý is-sharalaryna qatysyp, ózderin qyzyqtyrǵan suraqtar qoıyp, Qazaqstan Respýblıkasynda azamattyq qoǵamdy damytý boıynsha óz usynystaryn aıtty. Atap ótetin jaıt, belsendiler Azamattyq forýmnyń taqyryby men kún tártibin qalyptastyrýǵa qatysyp jatyr.

Almaty Qoǵamdyq keńesiniń hatshysy Altynaı Kóbeeva ózekti jáne júıeli máselelerdi talqylaý úshin osyndaı alańdardyń bolýynyń mańyzdylyǵyn atap ótti.

«Azamattyq qoǵam men memlekettiń ózara tıimdi is-qımyly úshin qoǵamshyldardy túrli deńgeıdegi Qoǵamdyq keńesterdiń, Respýblıka Prezıdenti janyndaǵy Ulttyq qoǵamdyq senim keńesiniń jumystaryna, sondaı-aq «Parlamenttik oppozıtsııa» jańa alańyna tartý kerek. Eń bastysy - azamattyq qatysý múmkindigi úshin jaǵdaı jasaý», - dedi A.Kóbeeva.

«Qamqorlyq» daǵdarys ortalyǵy jetekshisi Uljan Luqpanova forým uıymdastyrýshylaryna alǵysyn bildirdi.

«Búgin biz Azamattyq forým aıasynda úkimettik emes uıymdarǵa arnalǵan memlekettik syılyqqa ıe boldyq. Bizdiń uıym týberkýlezben kúresý jáne mıgranttar arasynda týberkýlezdiń taralmaýyn baqylaý boıynsha jumys istedi. Memleket tarapynan bul iske qosqan úlesimizdiń baǵalaǵanyna rızashylyǵymdy bildiremin. Biz bul jumysty aldaǵy ýaqytta da jalǵastyryp, Almaty halqynyń densaýlyǵyn saqtaý isine odan ári úles qosqymyz keledi», - dedi Uljan Luqpanova.

«Detı rısýıýt mır» qoǵamdyq qorynyń dırektory Móldir Bekjan memleket qoldaýyna úmitin bildirdi.

«Memlekettiń kommertsııalyq uıymdarǵa kóńil bóletini jáne osylaısha bizdiń qyzmetimizdi yntalandyratyny qýantady. Biz jumysty shynaıy yqylaspen jáne shyn júrekten jasaımyz. Ásirese, memleket tarapynan oń pikir men keri jaýap alǵan qýantady. Bizdiń qorymyzdyń negizgi maqsaty - elimizdegi balalar men jasóspirimder shyǵarmashylyǵyn qoldaý, ilgeriletý jáne damytý», - dedi ol.