Azamattyq boryshyn óz ómirinen joǵary qoıǵan M. Sýambekov jaıly úzik syr
ALMATY. QazAqparat - Álemde ózgeniń baqyty men tynyshtyǵy úshin óz ómirin qurban etýge daıar turatyn jandar bar. Olar eshqashan kórsetken kómegi úshin aqy suramaıdy.
Júregi «adamzat» dep soqqan jandar qópshilikke túsiniksiz kórinetin «uly maqsat» jolynda adal qyzmet etedi. Olar ózge adamdarǵa myna tirshiliktiń mán-maǵynasyn óz is-áreketimen túsindiredi. Psıhologııada bul jumbaq fenomen altrýızm dep atalady. «Uly maqsat» jolynda qanshama baılar sáýletti saraılarynan qashyp, ash-jalańashtardyń qasynda júrdi?!
Qanshama ǵalymdar salqyn jaılarynan bezip, aýrý meńdegen Afrıkada bir adamdy arashalap qalý úshin janyn pıda etti?!
Keı adamdar úshin bul ábestik bolyp kórinýi múmkin. Biraq, solardyń arqasynda jer betinen meıirim men janashyrlyq, qaıyrymdylyq joıylmaı tur. Jasyratyny joq, kez kelgen adamnyń keýdesindegi júrek olaı soǵa bermeıdi.
Qalaı desek te, qamshynyń sabyndaı qysqa ǵumyryn ózgelerdiń baqyty jolynda sarp etetinderge erekshe taǵzym...
Bizdiń maqalamyzdyń basty keıipkeri Maqsat Sýambekov te sondaı erekshe jaratylǵan azamattardyń biri edi.
Almaty oblysy, Raıymbek aýdany, Sarybastaý aýylynda 1958 jyly dúnıege kelgen ol mektep bitirgen soń 1977 jyly ásker qataryna shaqyrylady. Jas jigit Krasnodar aımaǵyndaǵy Joǵary áskerı avıatsııa áskeriniń 15516 áskerı bóliminde áskerı boryshyn ótep, 1979 jyly elge aman-esen oralady.
1986 jyly adamzat tarıhynda eń zulmat tehnogendik apat oryn aldy. Ol Chernobyl AES-indegi jarylys edi.
Maqsat Sýambekov jaqyndarynyń qarsylyǵyna qaramastan 1986 jyly 9 maýsymda apat zardabyn joıýshylar qataryna óz erkimen qosylyp kete barǵan. Bir jyl boıy ChAES mańyndaǵy apattyń zardabyn joıýshylarǵa janarmaı tasýshy qyzmetin atqardy.
«Árıne, bárimiz qarsy boldyq. Biraq, ózi tabandap turyp aldy. Sol kezde aınalasyndaǵylardyń bári arnaıy qaýipsizdik quraldaryn paıdalanyp júrse, ol oǵan mán bermegen eken. Eshqashan protıvogaz, maska kımegen. Keıin kelgen soń sonyń zardabyn tarta bastady», - dep sabaqtady áńgimesin Maqsattyń aǵasy Baqytjan Sýambekov.
1988 jyly Armenııanyń Spıtak qalasyn túp-tamyrymen qoqys úıindisine aınaldyrǵan jer silkinisi bolǵany tarıhtan belgili. 1987 jyly Ýkraınadan kelgen Maqsat Sýambekov bul joly da kómekke zárý jandarǵa qolushyn sozýdy azamattyq boryshym dep tapty. Sóıtip 1988 jyly ol jer silkinisinen keıingi qaıta qalpyna keltirý jumystaryna belsene atsalysqan.
Óziniń sońǵy mıssıonerlik saparyn jaqyndaryna aıtpaı ketken azamat 1991 jyly naýryzda nebári 33 jasynda leıkoz aýrýynan kóz jumǵan.
«Únemi elge kómek qolyn sozýǵa daıar turatyn. Sondaı namysshyl, dosyn esh qıyndyqta tastamaıtyn. Ózgeler dese óz ómirin de qurban etýge daıar turatyn», - dep eske alady dosyn Sarybastaý aýylynyń turǵyny Sapar Raýanov.
Sandar men derekterge súıensek, 1986-1989 jyldary Chernobyl apatynyń zardabyn joıýǵa 31748 qazaqstandyq qatysqan eken.
Qazir Qazaqstan boıynsha olardyń 4519-i ǵana tiri qalǵan. Al, bir Almatynyń ózinen 5118 adam attanǵan bolatyn.
