«Azamattyq baqylaý – chek talap et» aktsııasy: qazaqstandyqtarǵa 11,3 mln teńge syıaqy tólendi

NUR-SULTAN. QazAqparat – «Azamattyq baqylaý – chek talap et» aktsııasy aıasynda azamattyq belsendilik tanytqan qazaqstandyqtarǵa 11,3 mln teńge syıaqy tólendi. Bul týraly Memlekettik kirister komıtetinen málim etti, dep habarlaıdy QazAqparat.

«Bıyl aktsııa bastalǵannan beri azamattardyń habarlaýy boıynsha 11,3 myń zań buzýshylyq faktisi rastaldy, olarǵa 11,3 mln teńge somasynda syıaqy tólendi. Mundaı zań buzýshylyq úshin alǵashynda kásipkerge eskertý beriledi, al eger bir jyldyń ishinde qaıtalansa, aıyppul salynady. Aıyppul mólsheri kásipkerlik sýbektisiniń ólshemine (shaǵyn, orta, iri) baılanysty bolady. Jyl basynan beri zań buzýshylyqty qaıtalaǵany úshin 474 kásipkerge 14,6 mln teńgege aıyppul salyndy», - dep málimdeıdi Komıtettiń baspasóz qyzmeti.

Aıta keteıik, «Azamattyq baqylaý – chek talap et» aktsııasy 2020 jyldyń mamyr aıynan bastap ótkizilip keledi. Maqsat – azamattyq belsendilikti arttyrý, kásipkerler arasynda adal básekelestikti yntalandyrý, tutynýshylar quqyǵyn qorǵaý, sondaı-aq kóleńkeli ekonomıkanyń mólsherin qysqartý. Aktsııa aıasynda azamattar Memlekettik kirister organdaryna tıisti

nysandarda baqylaý-kassa mashınasynyń fıskaldy cheginiń berilmegeni jáne bank kartasyn qabyldaýdan bas tartqany týraly habarlaı alady.

Fıskaldy chekti bermeý jáne bank kartasyn qabyldaýdan bas tartý faktileri týraly App Store jáne Play market arqyly júkteletin «Wipon cashback» tegin mobıldi qosymshasynan habarlap, zań buzýshylyq faktisi rastalǵan jaǵdaıda telefon teńgerimine syıaqy alýǵa bolady.