Azamattyq avıatsııa salasynda halyqaralyq quqyq standarttary engiziledi
ASTANA. QazAqparat - Búgin Parlament Senaty Ekonomıkalyq saıasat ınnovatsııalyq damý jáne kásipkerlik komıtetiniń keńeıtilgen otyrysynda «Halyqaralyq áýe tasymaldarynyń keıbir qaǵıdalaryn birizdendirýge arnalǵan konventsııany ratıfıkatsııalaý týraly» zań jobasy talqylandy. 1999 jyldyń 28 mamyrynda Monrealda jasalǵan konventsııanyń maqsaty - azamattyq avıatsııa salasyndaǵy halyqaralyq quqyq standarttaryn engizý.
Qujatqa sáıkes, áýe tasymaly barysynda jolaýshy qaıtys bolǵan nemese dene jaraqatyn alǵan jaǵdaıda keltirilgen zııany úshin, ony qaıtys bolýyna nemese dene jaraqatyn alýyna sebep bolǵan áýe kemesiniń bortynda nemese qoný, túsirý boıynsha kez kelgen operatsııalar kezinde oryn alǵan jaǵdaılarǵa ǵana avıatasymaldaýshy jaýapty bolady.
Sonymen qatar, tirkelgen bagaj joıylǵan, joǵalǵan nemese búlingen jaǵdaıda keltirilgen zııany úshin, avıatasymaldaýshynyń kúzetinde bolǵan kez kelgen kezeń ishinde bolǵan jaǵdaılarda ǵana avıatasymaldaýshy jaýapty bolady. Avıatasymaldaýshy jolaýshylardy, bagajdy nemese júkti áýe arqyly tasymaldaý kezinde onyń keshigýi saldarynan keltirilgen zııan úshin jaýapty bolady. Biraq, eger ol jáne onyń qyzmetkerleri jáne agentteri zııandy boldyrmaý úshin barlyq múmkin bolatyn aqylǵa qonymdy qajetti sharalardy qoldanǵanyn nemese osyndaı sharalardy qoldanýy múmkin bolmaǵandyǵyn dáleldese, ol keshigý saldarynan keltirilgen zııan úshin jaýapty bolmaıdy. Al avıatasymaldaýshylar atalǵan Konventsııa boıynsha ózderiniń jaýaptylyǵyn tıisinshe saqtandyrýdy qamtasyz etýdi talap ete alady. Avıatasymaldaýshy ushyp baratyn qatysýshy memleket avıatasymaldaýshydan osy konventsııa boıynsha óziniń jaýaptylyǵyn tıisinshe saqtandyrýdyń qamtamasyz etilgenin dáleldeýdi talap ete alady. Komıtet depýtattary zań jobasyn palatanyń jalpy otyrysyna shyǵarý týraly sheshim qabyldady.
