Azamattyq avıatsııa komıteti ushý qaýipsizdigin qamtamasyz etpegen ushqyshtardy qyzmetinen bosatýdy usynady
ASTANA. 15 aqpan. QazAqparat - AN-24RV áýe kemesimen baılanysty oryn alǵan avıatsııalyq oqıǵany zertteý jumystary aıaqtaldy. Zertteý barysynda An-24RV ushaǵynyń ushý-qoný jolaǵynan shyǵyp ketý oqıǵasy ushaq úshin usynylatyn qoný jyldamdyǵyn saqtamaýdan jáne áýe kemesi komandıriniń tejeý júıesin der kezinde qoldana almaýynan oryn alǵandyǵy anyqtalǵan. Bul týraly QR Kólik jáne kommýnıkatsııa mınıstrligi baspasóz qyzmetinen habarlandy.
Zertteý nátıjelerinde QR Kólik jáne kommýnıkatsııa mınıstrliginiń Azamattyq avıatsııa komıteti óz quzyreti sheńberinde áýe kompanııasy basshylyǵynyń atyna áýe kompanııasynyń ushý qyzmetine jáne ushý qaýipsizdigin qamtamasyz etýge jaýapty tulǵalardy atqaryp otyrǵan qyzmetterinen bosatýǵa deıingi jaýapkershilikke tartý, buǵan qosa, áýe kemesiniń komandırin ekinshi ushqysh sanatyna aýystyrý týraly usynys berildi.
Osy oqıǵaǵa baılanysty ishki ister organdary qylmystyq is qozǵaǵan. Quqyq qorǵaý organdary tergeý jumystary barysynda oryn alǵan oqıǵaǵa óz baǵalaryn beretin bolady.
Buǵan qosa, otandyq avıatasymaldaýshy kompanııalardyń basshylaryna mundaı oqıǵanyń qaıtalanbaýy úshin atalǵan avıatsııalyq oqıǵanyń sebepterin ushý-tehnıkalyq quramyna jetkizý usynyldy.
Esterińizge salyp óteıik, 2013 jylǵy 7 aqpanda Taraz-Almaty reısin oryndaǵan AN-24RV (tirkeý № UP-AN416) ushaǵynyń Almaty halyqaralyq áýejaıyna qoný kezinde qoný baǵytynan shyǵyp ketip, ushý-qoný jolaǵynyń janyndaǵy qaýipsizdik jolaǵyna ótip ketý oqıǵasy oryn alǵan edi.
