Azamattyq avıatsııa komıteti ushaqta júk alyp júrý erejelerin túsindirdi
Aıta keteıik, joljúk pen qol júgin alyp júrý normalary boıynsha suraqtar jolaýshylar arasynda erekshe ózekti.
Osyǵan baılanysty «Qazaqstannyń avıatsııa ákimshiligi» AQ jolaýshylarǵa arnalǵan jıyntyq aqparatty jáne áýe kóliginde joljúk pen qol júgin alyp júrý qaǵıdalary boıynsha jalpy usynymdardy jarııalaýdy jón kórdi.
Qazaqstan Respýblıkasynyń áýe keńistigin paıdalaný jáne avıatsııa qyzmeti týraly Zańnyń 76-babynyń 1, 2-tarmaqtaryna sáıkes jolaýshylardy, joljúkti jáne júkterdi kommertsııalyq áýemen tasymaldaý áýe bıleti negizinde júzege asyrylady. Bul - jolaýshynyń áýemen tasymaldaý shartynyń talaptarymen tanysqanyn rastaý.
Qol júgi men joljúkti tegin alyp júrýdiń salmaǵyn, ólshemderin jáne normalaryn Áýe kóligimen jolaýshy, bagaj jáne júk tasymaldaý qaǵıdalarynyń 59, 62-tarmaqtaryna sáıkes avıakompanııa belgileıdi.
Bagajdy tirkegennen keıin avıakompanııa onyń saqtalýyna jaýap beredi. Jolaýshyǵa joljúk nómiri bar bırkanyń úzbeli talonyn joljúk jetkizý beketinde alynǵanǵa deıin saqtaý kerek.
Joljúk keshiktirilgen, jetispegen, búlingen nemese joǵalǵan jaǵdaılarda, sondaı-aq bagaj túbirtegi men joljúk nómiri bar bırkanyń úzbeli talonyn kórsetpeı joljúk berilgen jaǵdaıda tasymaldaý kezinde aqaýlyq týraly akt toltyrylady.
Múmkindigi shekteýli adamdar men júrip-turýy shekteýli toptar qataryndaǵy jolaýshylar jeke paıdalanýǵa arnalǵan zembilderdi jáne kreslo-arbany ózimen birge joljúk retinde qosymsha tegin alyp júre alady.
Joljúkti, qol júgin, sondaı-aq arnaıy joljúkti alyp júrý qaǵıdalary men normalary boıynsha egjeı-tegjeıli aqparat avıakompanııalardyń resmı veb-saıttarynda jarııalanady.
«Іshki reısterde joljúkti tasymaldaý kezinde týyndaǵan daýlar jergilikti zańnama sheńberinde qaralady. Halyqaralyq baǵyttar boıynsha shart sheńberinde avıakompanııalardyń jolaýshylar aldyndaǵy jaýapkershiligi qatysýshy avıatasymaldaýshylardyń qaǵıdalarymen retteledi jáne týyndaǵan barlyq daýlar qatysýshy tarap memleketteri ratıfıkatsııalaǵan konventsııalar men halyqaralyq kelisimderdiń erejelerine sáıkes qaralady» delingen habarlamada.
