Azamattyq avıatsııa komıteti ushaqta úı janýaryn tasymaldaý erejesin túsindirdi
ASTANA. QazAqparat - QR Azamattyq avıatsııa komıteti áýe kemesinde úı janýarlaryn tasymaldaý erejelerin túsindirdi, dep habarlaıdy QazAqparat tilshisi.
Janýarlar men qustardy tasymaldaý úshin aldymen áýe kompanııasynyń kelisimin alý qajet. Ol úshin ushatyn, ushýǵa bet alǵan jáne tranzıtpen ushatyn elderdiń veterınarlyq organdary bergen qujatty kórsetý kerek.
Jolaýshy janýarlar men qustardy tasymaldaý úshin aýa kiretin konteınerleri (tormen) bolýy tıis. Konteınerdiń nemese tordyń túbi sý ótkizbeıtin jáne sińirgish materıalmen qaptalǵan bolýy kerek. Janýarlar men qustardy aýa kiretin sańylaýy bar tyǵyz jabylǵan sebetterde, qoraptarda tasymaldaýǵa da ruqsat etiledi. Qustardyń torlary tyǵyz jaryq ótkizbeıtin matamen jabylady.
Tasymaldanatyn janýar men qustyń salmaǵy, onyń ishinde konteıner (tor) men tamaǵynyń salmaǵy, tegin tasymaldanatyn bagaj normasyna kirmeıdi jáne tarıf boıynsha aqy tólenedi.
Janýarlar tirkelgen bagaj retinde ǵana áýe kemesiniń oqshaýlanǵan júk bólmesinde tasymaldanady. Eger ushý oqshaýlanǵan júk bólmesi joq áýe kemesimen oryndalatyn bolsa, onda janýarlary bar torlar jolaýshylar salonyna ornalastyrylady.
Kórý qabiletinen aıyrylǵan jolaýshymen erip júrgen jetekteýshi ıtter tegin, torsyz tasymaldanady. Itte qarǵybaý men tumyldyryǵy bolýy tıis.
