Azamattyq avıatsııa komıteti sheteldik charterlerge tyıym salýdy engizý merzimin túsindirdi
ASTANA. 23 shilde. QazAqparat - «Qazaqstan Respýblıkasynyń keıbir zańnamalyq aktilerine ózgertýler men tolyqtyrýlar engizý týraly» QR Zańynyń óz kúshine enýine oraı,
sheteldik avıakompanııalardyń kommertsııalyq áýe tasymalymen qatysty Qazaqstan Respýblıkasynyń aýmaǵynda jasaqtalatyn turaqty emes (charterlik) reısterdi júzege asyrýyna, eger ózgesi halyqaralyq kelisimdermen nemese azamattyq avıatsııa salasyndaǵy quzyretti organmen berilgen ruqsatpen kózdelmegen jaǵdaıda, tyıym salynady. Bul týraly QR KKM baspasóz qyzmetinen habarlandy.
Zańda Azamattyq avıatsııa komıtetiniń ushýlardy júzege asyrýǵa bir rettik ruqsattardy berý múmkindigi kózdelgen normasyna baılanysty, mınıstrlik ruqsat berý jónindegi sheshimderdiń «ádil» túrde ótýin qamtamasyz etetin mehanızmdi ázirledi.
Turaqty emes halyqaralyq áýe tasymalyn júzege asyrýǵa ruqsat berý jáne ruqsat berýden bas tartý negizderi erejesine qajetti ózgertýler engiziletin bolady, sondaı-aq bul ereje ádilet organdarynda tirkeýden ótip, baspasózde resmı túrde jarııalanǵan soń, qoldanysqa engiziledi. Tirkeý jáne jarııalaý úderisi keminde 2 aıǵa sozylady.
Osy ýaqyt aralyǵynda, ıaǵnı ózgertýler óz kúshine engenge deıin, azamattyq avıatsııa salasyndaǵy quzyrly organ týrıstik charterlik tasymalǵa ruqsat berýge kedergi keltirmeıtin qoldanystaǵy QR Zańyn basshylyqqa alady.
Erejedegi ózgertýler óz kúshine engennen keıin (keminde 2 aıdan keıin) sheteldik kompanııalarǵa ruqsat kómek kórsetý maqsatynda charterlik tasymaldy uıymdastyrýǵa, issaparlar men jeke saparlar úshin, salondyq nusqadaǵy áýe kemelerimen júzege asyrylatyn bir rettik ushýlarǵa, sondaı-aq Qazaqstan Respýblıkasynyń avıatsııa bıligi men sheteldik memleketterdiń avıatsııa bılikteri arasyndaǵy ózara kelisimshart sheńberinde nemese qazaqstandyq avıakompanııalardyń charterlik tasymaldy júzege asyrýyna múmkindigi bolmaǵan jaǵdaıda ǵana beriledi.
Budan basqa, QR Kólik jáne kommýnıkatsııa mınıstrliginiń Azamattyq avıatsııa komıteti men QR Indýstrııa jáne jańa tehnologııalar mınıstrliginiń Týrızm komıteti Qazaqstandyq týrıstik qaýymdastyqpen birlese otyryp, týrıstik kompanııalardyń otandyq avıatasymaldaýshylardyń qyzmetin paıdalanýǵa kóshýi týraly bastama kóteretin bolady.
Aıta keteıik, Túrkııanyń Sky Airlines avıakompanııasynyń aǵymdaǵy jyldyń maýsym aıynda bankrotqa ushyraýy nátıjesinde qazaqstandyq týrıster satyp alǵan bıletteri boıynsha der kezinde elge orala almaı qalǵan bolatyn. Olardyń elge oralýy memlekettiń esebinen uıymdastyryldy. 2011 jyly dál osyǵan uqsas eki oqıǵa oryn aldy, sheteldik avıakompanııaǵa charterlik reıske tapsyrys berýshi - týrıstik operatorlardyń qarjylyq problemalaryna oraı, qazaqstandyq azamattar Haınan (Asia Wings,QR kompanııasy) jáne Sharm-El-Sheıh (Spot Air, egıpettik avıakompanııa) qalalarynan Qazaqstanǵa der kezinde qaıta almady.
Mundaı jaǵdaılardyń qaıtalanbaýy úshin QR Parlamentiniń depýtattary «Qazaqstan Respýblıkasynyń áýe keńistigin paıdalaný jáne avıatsııa qyzmeti» týraly QR Zańyna sheteldik avıakompanııalardyń qazaqstannan charterlik tasymaldy júzege asyrýyna tyıym salýdy kózdeıtin ózgeristerdi engizý týraly usynys bildirgen bolatyn.
Atalǵan ózgertýler múddeli memlekettik organdarmen, «Atameken Odaǵy» UEP-men kelisilip, Parlamenttegi jumys tobynyń 19 otyrysynda talqyǵa salyndy. Týrıstik reısterge qatysty dál osyndaı norma TMD elderi ishinde Reseı jáne Belorýssııa elderinde qoldanylady. Al, EO memleketterinde bul másele avıatsııalyq bılikpen jáne jergilikti tasymaldaýshylarmen kelisiledi.
