Azamattyq avıatsııa komıteti mınıstrlikten bólinýi múmkin
ASTANA. QazAqparat - QR Investıtsııalar jáne damý mınıstrliginiń azamattyq avıatsııa salasyndaǵy qyzmetin jańadan qurylatyn ulttyq kompanııaǵa berý máselesin qarastyrý ústinde, dep habarlaıdy QazAqparat.
«Birlesken jumystardyń negizinde (Brıtandyq azamattyq avıatsııa agenttigi - agenttik eskertpesi) bizder brıtandyq modeldi engizýdiń ádisterin ázirledik. Ol ushýlar qaýipsizdigi salasyndaǵy baqylaý jáne qadaǵalaý qyzmetterin azamattyq avıatsııa salasyndaǵy baqylaý men qadaǵalaý jónindegi ulttyq kompanııa nysanynda qurylatyn, mınıstrlikke esep beretin jańa qurylymǵa berý bóliginde qoldanystaǵy zańnamaǵa ózgerister engizýdi kózdeıdi», - delingen QR IDM janyndaǵy Azamattyq avıatsııa komıtetiniń baspasóz qyzmeti taratqan aqparatta.
Taratylǵan aqparatqa qaraǵanda, ınspektorlar túrindegi shtattyq sannyń bir bóligi ulttyq kompanııaǵa ótedi, al mınıstrlikte memlekettik saıasat pen halyqaralyq qarym-qatynastardy qalyptastyrý qyzmeti saqtalady.
Taratylǵan aqparatqa sáıkes, azamattyq avıatsııany retteýdiń brıtandyq modeli álemdegi eń aldyńǵy qatarly basqarý formasy sanalady jáne ushýlar qaýipsizdigi salasyndaǵy baqylaý men qadaǵalaýdy qamtamasyz etetin memlekettik korporatsııa bolyp eseptelinedi. Brıtandyq agenttiktiń shtattyq sany shamamen 800 adamdy quraıdy. Memlekettik korporatsııa azamattyq avıatsııa salasyndaǵy memlekettik saıasatty túzetin Ulybrıtanııanyń Kólik departamentine baǵynyshty.
