Azamattyq avıatsııa komıteti Qazaqstanda «Transaero» ushaqtarynyń ushýyna jáne bıletterdi qaıtarýǵa qatysty jaǵdaıǵa túsinik berdi
ASTANA. QazAqparat - «Transaero» áýe kompanııasy tóńireginde qalyptasqan jaǵdaıdy eskere otyryp, QR IDM Azamattyq avıatsııa komıteti áýe kompanııasynyń Qazaqstandaǵy ókildigimen tıisti jumystar júrgizýde, dep habarlaıdy vedomstvonyń baspasóz qyzmetinen.
Búginde «Transaero» áýekompanııasy Máskeýden Qazaqstannyń Astana, Almaty, Qaraǵandy, Aqtaý, Atyraý, Shymkent, Qostanaı, Kókshetaý, Aqtóbe, Qyzylorda qalalaryna turaqty reısterdi júzege asyrady. 2015 jyldyń 9 qazanyndaǵy jaǵdaı boıynsha «Transaero» áýe kompanııasy Qazaqstan men Reseı arasyndaǵy baǵyttar boıynsha turaqty reısterge 2015 jyldyń 15 jeltoqsanyna deıin 7150 bılet satqan. 1 qazannan bastap áýe kompanııasynyń reısterine bılet satý toqtatylǵandyqtan, 20 qazannan keıin reısterge ortasha júkteý 20-30% quraıdy.
Sondaı-aq «Transaero» AQ» AAQ Qazaqstandaǵy Bas ókildiginiń resmı aqparatyna sáıkes, ishki jáne halyqaralyq baǵyttar boıynsha resimdelgen bıletteri bar jolaýshylardy tasymaldaýdyń merzimi 2015 jyldyń 15 jeltoqsany saǵat 00.00 deıin dep belgilendi. Al 2015 jyldyń 15 jeltoqsanynan keıin ushatyn jolaýshylar bıletterin ótkizip, aqshalaryn tolyq kólemde qaıtaryp ala alady. Eskeretin jaıt, jolaýshylar áýe bıletterin satyp alǵan jerlerine ǵana ótkize alady. «Transaero» saıty arqyly satyp alynǵan bıletterdi ótkizýdi resimdeý úshin rev_reservation@transaero.ru elektrondyq adresine kelesi málimetterdi jiberýi kerek: jolaýshynyń aty-jónin latyn qarpimen jazyp jiberý; reıstiń nómiri; ushatyn kúni; 13 sannan turatyn áýe bıletiniń nómiri; bılet satyp alǵan kezde kórsetilgen e-mail; baılanys telefondary, qalanyń nemese memlekettiń kody qosa kórsetiledi; bıletti qaıtarý týraly qosymsha málimetter. «Transaero» áýe kompanııasynyń aqparatyna sáıkes, satylǵan bıletterdi qaıtarý úshin 100 mln. teńge qarjy qarastyrylǵan. Qazaqstanda bıletterdi qaıtarý «Transaero» AQ» AAQ QR Bas ókildigi (Astana) men Almaty qalasyndaǵy ókildiginde júzege asady. «Transaero» áýe kompanııasynyń reısteri bolmaı qalǵan jaǵdaıda tasymaldaý týraly kelisimge sáıkes áýe kompanııasy jolaýshylar aldyndaǵy barlyq jaýapkershilikti ózderine alady.
Qazaqstan men Reseı arasyndaǵy áýe tasymaly salasyndaǵy kelisimder boıynsha Reseı tarapy «Transaero» áýe kompanııasynyń reısterin júzege asyrýǵa basqa áýe kompanııasyn belgileýge quqyly. Jańa áýe kompanııasyn belgileý men ruqsat alý 30 kúnniń ishinde júzege asady. Qandaı da bir ózgerister bolsa, qosymsha habarlanady.
