Azamattyq avıatsııa komıteti bilikti mamandardy memlekettik ınspektor laýazymyna jumysqa shaqyrady
ASTANA. 22 shilde. QazAqparat - Azamattyq avıatsııa komıteti shtatyn avıatsııalyq bilimi jáne atalǵan salada aıtarlyqtaı tájirıbesi bar bilikti mamandarmen jasaqtaý maqsatynda memlekettik ınspektordyń bos 11 ornyna kezekti baıqaý jarııalady.
Bul týraly Kólik jáne kommýnıkatsııa mınıstrliginiń baspasóz qyzmetinen habarlady.
Ushýdy júzege asyrý basqarmasyndaǵy memlekettik ınspektordyń 4 bos ornyna taǵaıyndalǵan synaýshy nemese áýe kemesiniń komandıri (keminde 5000 ushý saǵaty) retinde ınstrýktorlyq tájirıbesi bar mamandar shaqyrylady. Azamattyq avıatsııa salasyndaǵy jumys ótili keminde 5 jyl bolýy tıis.
Ushý jaramdylyǵy basqarmasynyń memlekettik ınspektory laýazymyna úmitkerlerdiń (3 birlik) azamattyq avıatsııanyń áýe kemelerin jóndeý boıynsha nemese áýe kemelerine tehnıkalyq qyzmet kórsetý jáne áýe kemelerin paıdalaný standarttaryn qoldaný boıynsha bilimi men eńbek tájirıbesi bolýy, sondaı-aq azamattyq avıatsııa salasyndaǵy eńbek ótili 8 jyldan kem bolmaýy kerek.
Aeronavıgatsııa basqarmasynyń basshylyǵy men qyzmetkerlerine (3 birlik) úmitkerlerdiń azamattyq avıatsııa salasyndaǵy 5 jyldyq eńbek tájirıbesinen bólek, aeronavıgatsııalyq qyzmet kórsetý uıymdarynda (áýe qozǵalysyn uıymdastyrý jáne qyzmet kórsetý, ushýlardy radıotehnıkalyq qamtamasyz etý, aeronavıgatsııalyq aqparatpen qamtamasyz etý) basshylyq qyzmet atqarǵan tájirıbesi bolýy shart. Sondaı-aq, IKAO-nyń standarttary men usynystaryn, protsedýralaryn jáne aeronavıgatsııalyq qyzmet kórsetý salasyndaǵy halyqaralyq qujattaryn tolyq bilýi mindetti.
Avıatsııalyq medıtsına personalyna kýálik berýdi uıymdastyrý jónindegi basqarmanyń memlekettik ınspektory laýazymyna úmitkerler IKAO-nyń standarttary men usynystaryn, protsedýralaryn, sondaı-aq avıatsııalyq medıtsına salasyndaǵy basqa da halyqaralyq qujattardy bilýi mindetti. Azamattyq avıatsııa salasyndaǵy eńbek tájirıbesi keminde 5 jyldy quraýy kerek.
Joǵaryda kórsetilgen talaptardan basqa, barlyq úmitkerlerdiń Eýropalyq avıatsııalyq standarttarmen jumys isteýde eńbek tájirıbesiniń bolýy, tıisti kýrstardan ótkendigi jóninde sertıfıkattarynyń bolýymen qatar, IKAO-nyń baǵa shkalasy boıynsha aǵylshyn tilin 4- deńgeıde meńgerýi mindetteledi.
Memleket basshysynyń Jarlyǵyna sáıkes Azamattyq avıatsııa komıtetine qyzmetke tartylǵan mamandardyń eńbek aqysynyń deńgeıi joǵarylatylyp, búgingi kúni onyń kólemi avıatsııa salasyndaǵy mekemelerdiń eńbekaqysy deńgeıine saı kelip otyr.
