Azamattyq avıatsııa ákimshiligi «Bek Air» dálelderiniń negizsiz ekenin málimdedi
QR Azamattyq avıatsııa komıtetiniń Facebook-tegi paraqshasynda jarııalanǵan aqparatqa qaraǵanda, áýe kompanııanyń ótinishinde Qazaqstannyń avıatsııalyq ákimshiligi paıdalanýshy sertıfıkatyn qabyldanǵan sheshim týraly habardar etpeı jáne sebebin kórsetpeı toqtatty dep kórsetilgen. «Bek Air» AQ pikirinshe, bul «Azamattyq áýe kemelerin paıdalanýshyny sertıfıkattaý jáne oǵan sertıfıkat berý qaǵıdalaryn» buzý bolyp sanalady.
«Atalǵan dálelder kelesi jaǵdaılar baılanysty negizsiz bolyp tabylady. Paıdalanýshy sertıfıkatynyń qoldanylýyn toqtata turýǵa «Fokker-100» ushaǵynyń apaty sebep boldy. Bul týraly 2019 jylǵy 27 jeltoqsanda «Bek Air» AQ atyna jiberilgen RD270510 radıogrammasynda tikeleı kórsetilgen. Mundaı sheshim «Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» Zańǵa sáıkes qabyldandy. Onda sertıfıkattyń qoldanylýy ushý qaýipsizdigine tikeleı qater tóndiretin zańnama talaptarynyń eleýli buzylýy anyqtalǵan kezde shekteletini kórsetilgen. Sondaı-aq bul shara joǵaryda kórsetilgen qaǵıdalardyń talaptaryn negizge alady. Oǵan sáıkes ýákiletti uıym paıdalanýshy sertıfıkattyq talaptar men shekteýlerdi saqtamaǵan jaǵdaıda paıdalanýshy sertıfıkatynyń qoldanylýyn toqtata turady», - delingen taratylǵan aqparatta.
Komıtet dereginshe, áýe kompanııasy jasaǵan buzýshylyqtardy dál sol kúni qaralǵan áýejaıdyń beınejazbasy rastaıdy. Onda apatqa ushyraǵan ushaqty ushýǵa daıyndaý kezinde muzdanýdy joıý nemese onyń aldyn alý jónindegi sertıfıkattaý talaptary oryndalmaǵandyǵy, sondaı-aq paıdalanýshy olardyń oryndalýyn baqylaýdy qamtamasyz etpegendigi kórinedi.
Sonymen qatar bul «Qazaqstan Respýblıkasynyń azamattyq avıatsııasynda ushýdy júrgizý qaǵıdalaryn» óreskel buzý bolyp sanalady. Qaǵıdaǵa sáıkes eger qanattardyń, fıýzelıajdyń, basqarý organdarynyń, áýe vıntteriniń, aldyńǵy áınektiń, kúsh qondyrǵysynyń betterinde nemese áýe kemesiniń barometrııalyq aspaptarynyń aýa qysymyn qabyldaǵyshtarynda qyraý, dymqyl qar nemese muz bolsa, ushýdy bastaýǵa ruqsat etilmeıdi.
«Osyǵan baılanysty, «Bek Air» AQ-qa tıesili basqa áýe kemeleriniń ushý qaýipsizdigin qamtamasyz etý maqsatynda, 2019 jylǵy 27 jeltoqsanda Qazaqstannyń avıatsııalyq ákimshiligi paıdalanýshy sertıfıkatynyń qoldanylýyn toqtata turý týraly sheshim qabyldady. Sol kúni Memleket basshysy Q.Toqaevtyń tapsyrmasymen «Bek Air» AQ qyzmetine jospardan tys tekserý taǵaıyndaldy. Áýe kompanııanyń personaly, oqý baǵdarlamalary, qondyrǵylary, protsedýralary men ushaqtary ushýǵa jaramdy jáne talaptarǵa sáıkestigine kóz jetkizý maqsatynda tekseriledi. Joǵaryda kórsetilgen radıogramma paıdalanýshy sertıfıkatynyń qoldanylýyn toqtata turý týraly qabyldanǵan sheshimniń habarlamasy bolyp tabylady», - deıdi vedomstvodan
Aıta keterligi, zańnamaǵa sáıkes, zań buzýshylyqty joıý týraly ınspektsııalyq nusqama áli aıaqtalmaǵan tekserý qorytyndysy boıynsha beriledi. Sondaı-aq qazirgi ýaqytta Qazaqstannyń avıatsııalyq ákimshiligimen paıdalanýshynyń qyzmetinde júrgizilip jatqan jospardan tys tekserý aıasynda «Bek Air» AQ buǵan deıin berilgen sertıfıkatynyń sáıkestik máselesi zerttelýde.
