Azamattyq avıatsııa akademııasy BǴM tekserýinen ótpeı qalýyna qatysty túsinik berdi
«2009 jyly Halyqaralyq azamattyq avıatsııa uıymy Qazaqstandaǵy avıatsııalyq qyzmetkerlerdi daıarlaýda birqatar sáıkessizdikterdi anyqtady. Bul qazaqstandyq avıakompanııalardyń Eýropalyq Odaqtyń «qara tizimine» kirýine sebep bolǵan. Halyqaralyq avıatsııa uıymy 2016 jyly Qyrǵyz Respýblıkasynda tekserý júrgizý barysynda da avıatsııalyq qyzmetkerlerdiń biliktiligi týraly eskertpe jasaǵan. Osy sebepti Qyrǵyz Respýblıkasynyń avıatsııalyq qyzmetkerleriniń álemdegi barlyq memlekette, sonyń ishinde Qazaqstanda jumys isteýine tyıym salynǵan. Qyrǵyz Respýblıkasyndaǵy 21 ushqyshtan kommertsııalyq avıatsııa ushqyshy ekeni týraly kýáligi qaıtaryp alyndy», - deıdi Azamattyq avıatsııa akademııasynyń baspasóz qyzmeti.
Qazaqstanda avıatsııalyq qyzmetkererdi daıarlaýdy halyqaralyq talaptarǵa jáne azamattyq avıatsııa salasyndaǵy halyqaralyq tájirıbege sáıkes keltirý áreketi Qazaqstan Respýblıkasy Bilim jáne ǵylym mınıstrliginiń biliktilik talaptaryna qaıshy keledi.
«QR Bilim jáne ǵylym mınıstrligi júrgizgen tekserister barysynda «Azamattyq avıatsııa akademııasy» AQ lıtsenzııasynyń qoldanysy toqtatyldy. 2012 jyly akademııa qaıtalanǵan tekseristen óte almaı, keıin sot arqyly lıtsenzııasyn qaıtaryp alǵan. Dál osyndaı jaǵdaı búgin de oryn alyp otyr. Akademııanyń tekserisinen ótpeýiniń negizgi sebebi – avıatsııalyq ınjenerlik kadrlardy daıarlaý salasyndaǵy ǵylymı dárejeli mamandardyń jetkiliksizdigi», - deıdi baspasóz qyzmeti.
Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» QR Zańynyń 3-babyna sáıkes – eger Qazaqstan Respýblıkasy ratıfıkatsııalaǵan halyqaralyq shartta osy zańda kózdelgennen ózgeshe erejeler belgilense, onda halyqaralyq sharttyń erejeleri qoldanylady, alaıda Bilim mınıstrligi bul talapty esepke almaıdy.
«Halyqaralyq azamattyq avıatsııa uıymnyń negizgi talaptary – ǵylymı dárejelerdiń bolýy emes, azamattyq avıatsııa salasyndaǵy ýákiletti organmen bekitilgen sertıfıkatqa sáıkes biliktilik deńgeıi bar nusqaýshylardyń bolýy. Bul – ushý qaýipsizdigin qamtamasyz etýge kómektesedi, ol úshin avıatsııalyq qyzmetkerdiń biliktilik dárejesiniń róli zor. Osy maqsatta QR Indýstrııa jáne ınfraqurylymdy damytý mınıstrligi qazirgi ýaqytta joǵary mamandandyrylǵan oqý orny mártebesin berýge baǵyttalǵan «Bilim týraly» Qazaqstan Respýblıkasynyń Zańyna ózgerister engizý týraly» zań jobasyn usyndy. Bul Akademııaǵa azamattyq avıatsııa salasynda jáne Qazaqstan Respýblıkasynda ushý qaýipsizdigin qamtamasyz etý salasynda básekege qabiletti kadrlardy daıarlaý boıynsha salalyq retteýshilerdiń, halyqaralyq standarttardyń jáne halyqaralyq tájirıbeniń talaptaryna sáıkes kelýine múmkindik beredi», - delingen baspasóz habarlamasynda.
