Azamattyq alǵanyna qaramastan oralmandar kvota ıelenýge, memleket tarapynan járdem alýǵa quqyǵy bolýy shart - Q. Sádýaqasov

Búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» taqyrybynda ótken dóńgelek ústel barysynda depýtat Qaırat Sádýaqasov osylaı málim etti, dep habarlaıdy QazAqparat.

«Buǵan deıin de talaı áńgime arqaýy bolyp júrgen «oralman» mártebesin berýge zańnamalyq turǵydan yqpal etý qajet dep bilemiz. Buny ómirdiń zańdylyǵynan týyndaǵan shara dep túsingen lázim. Máselen, qazirgi tańda shetelden kelgen qandastarymyz azamattyǵyn alǵan jaǵdaıda «oralman» mártebesinen aıyrylyp qalady. Sondyqtan da, birqatar týystarymyz kvotaǵa ený maqsatynda Qazaqstanǵa kelgennen keıingi biraz ýaqyt boıy azamattyǵyn almaı júrip alady. Elimizge kelip, sheteldik azamat sekildi tirkelip turady. Nátıjesinde kóptegen quqyqtyq jáne qujattyq kedergilerge soqtyǵady. Bul olardyń áleýmettik-ekonomıkalyq jaǵdaıyna da eleýli áser etedi. Sondyqtan, bizdiń oıymyzsha, kez-kelgen shetelden kóship kelgen etnıkalyq qandastarymyz elimizde tirkelgen sátten bastap úsh jylǵa deıingi jeńildikterdi ıelenýi tıis. Osy úsh jyldyń ishinde azamattyq alǵanyna qaramastan oralmandar kvota ıelenýge, memleket tarapynan járdem alýǵa da quqyǵy bolýy shart», dedi Q. Sádýaqasov.

Onyń aıtýynsha, atalmysh qadam oralmandardyń azamattyq alý máselesine qatysty týyndaıtyn problemalardy jeńildete túsedi. Sonymen birge, depýtat shetelden kóship kelgen etnıkalyq qazaqtardyń basym bóligi memlekettik kvotasyz, óz kúshimen kelgender ekendigin atap ótti. Biraq, osylaısha óz betimen elge umtylǵandardyń barshasy kedendik alymdardan bosatylmaıdy eken. «Osy másele qandastarymyzdy elge oraltý úderisine keri áserin tıgizedi. Sondyqtan etnıkalyq qazaqtardyń óz betimen kóship kelýine barynsha jaǵdaı jasaý qajet. Sonyń bir tetigi retinde Otanyna oralǵysy keletin etnıkalyq qazaqtar úshin ózderimen birge ákeletin dúnıe-múlikterine kedendik bajdy boldyrmaý qajet», dedi Q. Sádýaqasov.