Azamattyq jaýapkershilik tanytýǵa shaqyramyz - Ortalyq referendým komıssııasy úndeýi
ASTANA. KAZINFORM — Ortalyq referendým komıssııasy 15 naýryzǵa taǵaıyndalǵan respýblıkalyq referendýmǵa oraı el turǵyndaryna úndeý jasady.
- Sizdiń referendýmǵa qatysýǵa konstıtýtsııalyq quqyǵyńyzdy iske asyrýdyń kepili – sizdi respýblıkalyq referendýmǵa qatysýǵa quqyǵy bar azamattardyń tizimine engizý. Tizimderdi jergilikti atqarýshy organdar daýys berý úshin naqty ýchaskeniń aýmaǵynda turǵylyqty jerińiz boıynsha turaqty tirkelýińizdiń negizinde jasaıdy. Ýaqytsha tirkelgen azamattar bergen ótinishi negizinde tizimge engiziledi. Daýys berýge arnalǵan ýchaskeler men olardyń shekaralary týraly málimetterdi tıisti ákimder 2026 jylǵy 21 aqpanǵa deıin jarııalaıtyn bolady. Siz ózińizdiń ýchaskeńizdi bilip, tizimge engizilgenińizdi tirkelgen jerińiz boıynsha jergilikti atqarýshy organǵa habarlasý arqyly teksere alasyz, - delingen úndeýde.
Sondaı-aq málimdemede tizimde bolmaǵan jaǵdaıda ákimdikke tıisti ótinish berýge ár azamat quqyly ekendigine nazar aýdartady.
- 2026 jylǵy 27 aqpannan bastap sizdiń daýys berý ýchaskeńizde sizge respýblıkalyq referendýmǵa qatysýǵa quqyǵy bar azamattar tiziminde ózińiz týraly derekterdi tekserý múmkindigi beriledi. Eger qandaı da bir ózgerister engizý qajet bolsa, siz dereý ýchaskelik referendým komıssııasyna ótinishpen júgine alasyz. Sizdi azamattyq jaýapkershilik tanytýǵa jáne 2026 jylǵy 15 naýryzda respýblıkalyq refrendýmǵa qatysý quqyǵyńyzdy iske asyrýǵa shaqyramyz, - delingen úndeýde.
Buǵan deıin referendýmdy ázirleý men ótkizý jónindegi negizgi is-sharalardyń jospary bekitilgenin jazǵan edik.