Kassatsııalyq sotqa 5 myńǵa jýyq aryz-shaǵym tústi - Joǵarǵy sot tóraǵasy

ASTANA.KAZINFORM - Prezıdent Joǵarǵy Sot tóraǵasy Aslambek Merǵalıevti qabyldady, dep habarlaıdy Aqorda.

Memleket basshysyna bıylǵy jeti aıdaǵy sot júıesi qyzmetiniń qorytyndylary jóninde baıandaldy.

Qasym-Jomart Toqaevqa azamattyq ister boıynsha daýlardy sheshýdiń balamaly ádisterin qoldaný 24 paıyzǵa, ıaǵnı, 61 myńnan 76 myńǵa deıin óskeni aıtyldy. Olardyń qatarynda medıatsııa, bitimge kelý men tatýlastyrý rásimderi bar.

Aslambek Merǵalıevtiń aıtýynsha, azamattardyń memlekettik organdarmen aradaǵy daýlar boıynsha quqyǵyn qorǵaý sheńberinde ákimshilik organdar men laýazymdy tulǵalardyń 2,6 myń aktisi (57 paıyz) zańsyz dep tanyldy.

Sondaı-aq Prezıdentke qylmystyq is júrgizýde konstıtýtsııalyq quqyqtar men bostandyqtardy qamtamasyz etý sharalary týraly málimet berildi. Atap aıtqanda, tergeý sottarynyń qamaýǵa alýdy sanktsııalaýdan bas tartý úlesi 23 paıyzdan 37 paıyzǵa ósti. Aqtalǵan azamattardyń sany (jeke aıyptaý isterin qospaǵanda) 59-dan 88-ge jetti.

Memleket basshysynyń tapsyrmasyna sáıkes, bıylǵy 1 shildeden bastap derbes kassatsııalyq sot jumys isteı bastady. Alǵashqy aıdyń ózinde atalǵan mekemege 5 myńǵa jýyq aryz-shaǵym túsken.

Kezdesý sońynda Qasym-Jomart Toqaev halyqtyń sot júıesine senimin nyǵaıtý jáne sot tóreliginiń sapasyn arttyrý jumystaryn jalǵastyrýdyń mańyzdy ekenin atap ótti.

Osyǵan deıin Memleket basshysy Kongo prezıdentiniń arnaýly ókili Patrık Mpoıı Lýabeıany qabyldaǵany týraly jazdyq.