Azamattyq nekeden týǵan balaǵa ákesi alıment tóleı me – zańger jaýaby

ÓSKEMEN. KAZINFORM – Zańger Alekseı Bajkov azamattyq nekeden týǵan balaǵa ákesi alıment tóleıtin-tólemeıtindigin aıtty.

Qazirgi zamanda zańdy nekege otyrmaı-aq bir shańyraqtyń astynda turyp jatqandardy estip, kórip júrmiz. Arasynda balaly bolyp, keıin aıyrylysyp jatatyndar da bar. Sol kezde balasyn asyraý, baǵyp-qaǵý jalǵyz anasyna júk bolyp qalady.

Al perzentiniń ákesimen nekege turmaǵan áıeldi «alıment óndire alamyn ba?» degen suraq mazalaıtyny anyq. Bul saýalǵa zańger Alekseı Bajkov jaýap berdi.

«Eger azamattyq nekede tursa, onda olar ajyrasýǵa aryz bere almaıdy, óıtkeni is júzinde neke bolmaǵan. Eger er adam balanyń ákesi dep tanylsa, onda áıel balaǵa alıment talap etýge quqyly. Al ákesi alıment tóleýge kelispegen jaǵdaıda, tıisti aryzben sotqa júginýi qajet. Biraq áıel alımenttiń onyń jalaqysy emestigin, tek balaǵa arnalǵan qarajat ekenin este ustaýy kerek», - dep jaýap berdi ol Kazinform tilshisiniń saýalyna.