Azamattyq qorǵaý salasy boıynsha 8 myńnan astam adam bilim aldy - TJM
ASTANA. KAZINFORM - Jyl basynan beri Qazaqstan Tótenshe jaǵdaılar júıesinde azamattyq qorǵaý máseleleri boıynsha 8 362 tyńdaýshy oqytýdan ótti, dep habarlaıdy QR Tótenshe jaǵdaılar mınıstrliginiń baspasóz qyzmeti.
Halyqty, memlekettik organdar men uıymdardyń ókilderin daıarlaý jumystaryn Azamattyq qorǵanys ulttyq ortalyǵy jáne TJM-niń aýmaqtyq bólimsheleri júzege asyrady.
Azamattyq qorǵanys ulttyq ortalyǵynda 938 tyńdaýshy oqytýdan ótti. Olardyń qatarynda ortalyq memlekettik organdar men jergilikti atqarýshy organdardyń ókilderi bar.
Oqý barysynda qatysýshylar azamattyq qorǵaýdyń negizderin, tótenshe jaǵdaılar kezindegi is-qımyl tártibin, sondaı-aq tótenshe jaǵdaılardyń aldyn alý jáne olardyń saldaryn joıý jónindegi is-sharalardy uıymdastyrý men ótkizý máselelerin meńgerdi.
TJD bólimsheleri 7 424 adamdy oqytty. Qaýipsizdik salasyndaǵy eriktiler qozǵalysyn damytýǵa erekshe nazar aýdarylyp otyr. Jyl basynan beri 549 erikti daıyndyqtan ótip, profılaktıkalyq is-sharalardy ótkizýge qoldaý kórsetip, halyq arasynda qaýipsizdik mádenıetin arttyrý jumystaryna qatysyp jatyr.
Halyq pen mamandardy oqytý – tótenshe jaǵdaılar jaǵdaıynda is-qımyl jasaýǵa daıyndyq deńgeıin arttyrýǵa jáne azamattardyń ómiri men densaýlyǵyna tónetin qaýip-qaterlerdi azaıtýǵa baǵyttalǵan TJM qyzmetiniń negizgi baǵyttarynyń biri bolyp tabylady.
Osyǵan deıin habarlaǵanaymyzdaı, TJM qutqarýshylary seısmıkalyq qaýipter boıynsha halyqaralyq jattyǵýǵa attandy.
