Azamattyq qorǵaý organdary qyzmetkerlerine qosymsha járdemaqy men ústemeaqy tólenýi múmkin
Azamattyq qorǵaý organdarynda kúsheıtilgen jumys tártibinde qyzmet etken mamandarǵa ústemeaqy tólenedi. Bul týraly Májiliste azamattyq qorǵaýǵa qatysty zań jobasyn tanystyrý kezinde Tótenshe jaǵdaılar vıtse-mınıstri Baýyrjan Syzdyqov aıtty, dep habarlaıdy Kazinform.
Zań jobasy Úkimettiń 2023 jylǵa arnalǵan zań jobalaý jumystarynyń josparyna sáıkes ázirlendi. Joba Memleket basshysynyń tapsyrmalaryn iske asyrýǵa, sondaı-aq azamattyq qorǵaý salasyndaǵy qaýipsizdikti qamtamasyz etý jónindegi sharalardy kúsheıtýge baǵyttalǵan. Zań jobasynda 4 kodekske jáne 17 zańǵa túzetý engizý eskerilgen.
«Azamattyq qorǵaý organdary qyzmetkerleriniń áleýmettik jaǵdaıyn jaqsartý qarastyrylǵan. Onyń ishinde basqa jerge kóshýge baılanysty qyzmetkerlerdi aýystyrý jáne qyzmet babynda ilgeriletý kezinde kóterme járdemaqylar tóleýdi júzege asyrý, óz múlkin tasymaldaǵany úshin shyǵyndardy óteý, jaýyngerlik is-qımyldarǵa uqsas jaǵdaılardaǵy jumysy úshin ústemeaqy tóleý eskerilgen. Jaýyngerlik is-qımyldarǵa toqtalsaq, bizde jumystyń kúsheıtilgen tártibi engizilip jatady. Sol kezde mamandar táýlik boıy qyzmetinde bolady. Osyndaı jaǵdaılarda ústemaqy tólenedi», - dedi B. Syzdyqov.
Sonymen qatar, qujat aıasynda adamdar kóp jınalatyn nysandardy jáne bıiktigi 28 metrden asatyn ǵımarattardy paıdalanýǵa qabyldaý boıynsha Tótenshe jaǵdaılar mınıstrligine burynǵy quzyretin qaıtarý usynylǵan. Bul rette órt salasyndaǵy baqylaý nazarǵa alynady.
«Ónerkásiptik qaýipsizdikti qamtamasyz etýge erekshe mán berilgen. Óndiristik jaǵynan qaýipti nysandardaǵy tehnıkalyq dırektordan bólek basqa da basshylardyń Tótenshe jaǵdaılar mınıstrliginde emtıhan tapsyrýyn usynyp otyrmyz. Nege? Sebebi tehnıkalyq baǵyttaǵy basshysy eńbek demalysyna, issaparǵa ketken kezde, onyń mindetterin basqa basshylar atqarady. Sondyqtan barsha basshylyq quram qaýipsizdik jaǵdaıyna jiti nazar aýdarýy úshin bilimin jetildirip, emtıhan tapsyrýy tıis. Atap aıtqanda, jyl saıyn qaýipti óndiristik nysandardaǵy tehnıkalyq jabdyqtar eskirip jatyr jáne ony aýystyrýda kemshilikter barshylyq. Bul turǵyda, quraldardy jańartý men tehnıkalyq qaıta jaraqtandyrýdyń jıyntyq josparyn Tótenshe jaǵdaılar mınıstrligimen kelisý mindetin engizip otyrmyz», - dedi vıtse-mınıstr.
Budan bólek, qujatta týrısterdiń, ekskýrsanttardyń, týrıstik qyzmetti júzege asyratyn adamdardyń, elimiz aýmaǵynda turaqty turatyn azamattar men adamdardyń TJM aýmaqtyq organdaryn aldaǵy júrip-turý marshrýttary týraly habardar etýi jónindegi mindetterin engizý usynyldy.
«Elimizge kelgen týrıster taýly jerlerge barǵan kezde, joǵalyp jatady. Sondyqtan týrıstik mekemeler Tótenshe jaǵdaılar mınıstrliginiń aýmaqtyq bólimshelerine olardyń júretin joldary men baǵdary jaıynda málimet berýi kerek. Zań kúshine ense, týrıster ózimen birgen GPS treker alyp júrýi kerek. Bul óz kezeginde taýǵa shyqqan adamdardy tez arada qutqarýǵa múmkindik beredi», - dedi Baýyrjan Syzdyqov.
Sonymen qatar, seısmıkalyq qaýipsizdikti qamtamasyz etý jónindegi normalardy belgileýge, onyń ishinde seısmıkalyq qaýiptilik pen táýekeldi baǵalaýǵa, jer silkinisinen qorǵaý jónindegi is-sharalardy belgileýge azamattyq qorǵaý salasyndaǵy ýákiletti organǵa seısmıkalyq qaýipsizdikti qamtamasyz etý jónindegi quzyretti berý qarastyrylǵan.
