Azamattyq qorǵaý akademııasyndaǵy oqıǵa: 3 oqytýshy, 3 kýrsant sottaldy

ASTANA. KAZINFORM – Tótenshe jaǵdaılar mınıstrligi Azamattyq Qorǵaý akademııasynda bolǵan para berý oqıǵasyna qatysty 6 adam sottaldy. Bul týraly QR Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov aıtty.

— Aqmola oblysynyń kámeletke tolmaǵandar isteri jónindegi soty jemqorlyq qylmystyq quqyq buzýshylyqtary úshin Tótenshe jaǵdaılar mınıstrligi Azamattyq Qorǵaý akademııasynyń oqytýshysy G. Hasanova, saptyq bólimshe komandırleri I. Ernazar, R. Shaıkenov, sondaı-aq kýrsanttar B. Seıtebaı, A. Amanbaı jáne A. Erkinderdi sottady. Úkim oqý ornynda barlyq jeke quramnyń aldynda jarııalandy. Hasanova para alǵany úshin, al oqýshylar jalpy bilim berý páni boıynsha aralyq baqylaýdan ótýge para bergeni úshin kináli dep tanyldy, - dedi ol. 

Málim bolǵandaı, oqý vzvodtarynyń komandırleri Ernazar men Shaıkenov kýrsanttarǵa serjant ataǵyn alyp berem degen jeleýmen olardyń aqshalaı qarajatyn ıemdengen.

Ernazar Reseı TJM akademııasyna oqýǵa túsýge járdemdesý syltaýymen talapkerdiń ata-anasynan somasy 2,5 mln teńge aqshalaı qarajat alǵan.

Sot úkimimen Ernazar 3 jyl 6 aıǵa bas bostandyǵynan aıyryldy, Hasanova, Shaıkenov jáne basqalarǵa aıyppul túrinde jaza taǵaıyndalyp, ómir boıy memlekettik qyzmette jáne kvazımemlekettik sektor sýbektilerinde qyzmet atqarý quqyǵynan aıyryldy.

Sonymen qatar, sottalǵandar: Hasanov – polkovnık, Ernazar – kapıtan jáne Shaıkenov - azamattyq qorǵaý aǵa leıtenanty arnaıy ataqtarynan aıyryldy.

Sot aktisi zańdy kúshine engen joq.

Aıta keteıik, Astanada para alyp, balabaqsha ornyn saýdaǵa salǵan sheneýnik ustaldy.

Sportty damytý dırektsııasynyń basshysy 584 mln teńge qarjy jymqyrǵany anyqtaldy. 

«Kaspıı» FK basshysy dinı aǵym ókilderimen birlese aqsha bopsalaǵany belgili boldy.