Azamattyq qorǵanys salasynyń biryńǵaı vedomstvoaralyq radıojelisi iske qosyldy
ASTANA. KAZINFORM - Qazaqstan Respýblıkasynyń azamattyq qorǵaý memlekettik júıesiniń biryńǵaı vedomstvoaralyq radıo jelisinde jumys bastaldy, dep habarlaıdy QR Tótenshe jaǵdaılar mınıstrliginiń baspasóz qyzmeti.
Qazaqstan Respýblıkasynda aýmaqtyń edáýir uzaqtylyǵyna baılanysty árbir óńirde ÝQT-radıobaılanys júıesi derbes qalyptasty. Tehnıkalyq sheshimderdiń bytyrańqylyǵy, biryńǵaı standarttyń bolmaýy jáne óńiraralyq ózara is-qımyldyń shekteýli múmkindikteri, ásirese tótenshe jaǵdaılarda bólimshelerdi basqarý tıimdiligin aıtarlyqtaı tómendetti.
Baılanystyń ornyqtylyǵyna, senimdiligine jáne jedeldigine qoıylatyn ósip kele jatqan talaptar respýblıkalyq deńgeıdegi biryńǵaı ortalyqtandyrylǵan ÝQT-radıobaılanys júıesin qurýǵa negiz boldy.
Osy mindetti iske asyrý úshin Tótenshe jaǵdaılar mınıstrligi, Ulttyq ulan jáne Qazaqstan Respýblıkasy Іshki ister mınıstrligi ókilderiniń qatysýymen vedomstvoaralyq jumys toby quryldy.
Jumys tobynyń qyzmeti sheńberinde vedomstvoaralyq radıojelini qurý qaǵıdattaryn, radıoqamtýdyń basym aımaqtaryn aıqyndaýdy, ınfraqurylym obektilerin ornalastyrýdy, sondaı-aq basqarý tıimdiligin jáne kúshter men quraldardyń ózara is-qımylyn arttyrý maqsatynda jobany iske asyrýdyń kezeńdiligin qosa alǵanda, ony uıymdastyrý máseleleri egjeı-tegjeıli qarastyryldy jáne pysyqtaldy.
Qabyldanǵan sheshimderdiń qorytyndysy boıynsha negizgi eldi mekender men negizgi kólik baǵyttaryn qosa alǵanda, Qazaqstan Respýblıkasy aýmaǵynyń negizgi bóliginde radıoqamtýdy basym qamtamasyz ete otyryp, jelini kezeń kezeńmen óristetý kózdelgen. Jyl boıy bazalyq stantsııalardy ornatý boıynsha montajdaý jumystary júrgizildi.
Qoıylǵan mindetti iske asyrý elimizdiń barlyq óńirlerin biryńǵaı radıo jelisine biriktirýge múmkindik berdi jáne ony odan ári keńeıtý úshin, onyń ishinde shalǵaıdaǵy aýdan ortalyqtary men jetýge qıyn aýmaqtardy qamtý esebinen jaǵdaı jasady.
Júıeni odan ári damytý sheńberinde 2026 jyly oblys ortalyqtarynda, respýblıkalyq mańyzy bar qalalarda jáne Astanada turaqty radıosıgnaldy qamtamasyz etý úshin qosymsha bazalyq stantsııalardy satyp alý kózdelgen.
SmartOne dıspetcherlik platformasyn qoldana otyryp, aýdandyq bólimshelerdiń tsıfrlyq retranslıatorlaryn iri aýyldyq eldi mekenderde, shalǵaıdaǵy obektilerde, avtojoldarda jáne orman alqaptarynda radıobaılanysty qamtamasyz etý úshin keıinnen ony ulǵaıta otyryp, trankıngtik jelige biriktirý josparlanyp otyr.
Damýdyń kelesi mańyzdy kezeńi trankıngtik jeliler, 3G/4G/LTE keń jolaqty qoljetimdilik jelileri jáne Internet jelileri korrespondentteriniń jumysyn biryńǵaı kommýnıkatsııalyq keńistikte biriktirýge múmkindik beretin HyTalk kommýtatsııalyq jabdyǵyn paıdalana otyryp baılanysty uıymdastyrý bolady.
Aıta ketý kerek, Qazaqstan Respýblıkasy TMD keńistiginde bundaı aýqymdaǵy jáne aýmaqtyq qamtýdaǵy radıo jelisin iske asyrǵan alǵashqy el bolyp tabylady.
Osyǵan deıin Almatydaǵy teleradıo munarasyna jańa sáýlettik jaryq ornatylyp jatqany týraly jazdyq.