Ashhabad áýejaıynda qalyp qoıǵan qazaqstandyqtardyń jaǵdaıy qalaı

ASTANA.KAZINFORM —  Qazaqstannyń Azamattyq avıatsııa komıteti Ashhabad áýejaıynda uzaq ýaqyttan beri ushaqqa otyra almaı otyrǵan qazaqstandyq jolaýshylardyń jaǵdaıyna baılanysty resmı málimdeme jasady.

— FlyDubai habarlaýynsha, qazir Ekaterınbýrgke ushatyn reıske otyrǵyzý aıaqtalyp jatyr. Astana-Dýbaı reısi úshinshi kezekte tur, otyrǵyzý saǵat 23:00–de bastalady. Bastapqy ushý ýaqyty 22:00–ge josparlanǵan bolatyn, biraq áýejaıdyń reısterge qyzmet kórsetýdiń keshigýine baılanysty ushý keıinge shegerildi. Azamattyq avıatsııa komıteti kidiristerdi azaıtý úshin áýejaı jáne áýe kompanııa ókilderimen turaqty baılanysta, — delingen habarlamada. 

Komıtettiń baspasóz qyzmeti jaǵdaıdy baqylaýda ustap otyrǵandaryn jáne áýejaı men áýe kompanııa ókilderimen turaqty baılanysta ekenin málimdedi.

Jolaýshylarǵa sabyr saqtap, áýejaı tablosy men resmı aqparat kózderindegi jańalyqtardy baqylap otyrý usynyldy.

Eske salsaq, jumaǵa qaraǵan túni Izraıl Irannyń birqatar ıadrolyq nysandaryna soqqy jasaǵan bolatyn. Osyǵan baılanysty Qazaqstannyń Syrtqy ister mınıstrligi resmı málimdeme jasady. Qazaqstan Taıaý Shyǵys elderine áýe keńistigin japty.