Azamattyq avıatsııa akademııasyna bólinetin grant sany artty
ASTANA. KAZINFORM — Ǵylym jáne joǵary bilim vıtse-mınıstri Gúlzat Kóbenova azamattyq avıatsııa salasy úshin kadr daıarlaý jumystary jóninde baıandady.
Memleket basshysynyń 2025 jylǵy 3 jeltoqsandaǵy avıahabtardy damytý týraly tapsyrmasyna sáıkes, azamattyq avıatsııa salasyna kadr daıarlaý júıesi jańǵyrtylyp jatyr. Qazirgi ýaqytta kadrlar daıarlaýdy Azamattyq avıatsııa akademııasy júrgizedi.
— Qabyldanyp jatqan sharalardyń nátıjesinde stýdentter kontıngenti ósip keledi. 2022 jyly akademııada 1 438 stýdent bilim alsa, 2025 jyly bul kórsetkish 2 478 adamǵa jetti. Sońǵy tórt jylda ósim 72 paıyzdan asty, — dedi vıtse-mınıstr Úkimettiń búgingi otyrysynda.
Avıatsııadaǵy kadrlarǵa suranys eskerilip, sońǵy jyldary memlekettik granttar sany aıtarlyqtaı artty. Eger 2022-2023 oqý jylynda 180 grant bólinse, 2025-2026 oqý jylyna 618 grant qarastyrylǵan.
Túlekterdi jumysqa ornalastyrý kórsetkishi de joǵary. Qazirgi tańda ol 90% (2022 j. 86%) jetip otyr. Túlekter áýejaılarda, avıakompanııalarda, logıstıkalyq jáne aeronavıgatsııalyq uıymdarda eńbek etip júr.
— Akademııada tsıfrlyq tehnologııalar men jasandy ıntellekt elementteri belsendi engizilip jatyr. AI-SANA baǵdarlamasy aıasynda myńnan astam stýdent tsıfrlyq quzyretterdi meńgerdi. Eki myńnan astam bilim alýshy Coursera platformasynda oqýdan ótti. 2040 jylǵa deıingi jańa mamandyqtar atlasy ázirlenip, jańa kásipter men quzyretter engizilip jatyr. Akademııa jańa paıda bolatyn, transformatsııaǵa jatatyn kásipterdi eskerip, bilim baǵdarlamalaryn ózektendirip jatyr, — dedi Gúlzat Kóbenova.
Aıta keteıik, avıatsııalyq qaýipsizdik boıynsha Qazaqstan álemdegi úzdik 20 eldiń qataryna endi.
