Azamattyq alýǵa arnalǵan test qashan ótetini belgili boldy

ASTANA. KAZINFORM — Qazaqstan Respýblıkasynyń azamattyǵyn alýǵa úmitkerler úshin testileýge ótinishterdi qabyldaý 3-10 aqpan aralyǵynda ótedi, dep habarlaıdy Ulttyq testileý ortalyǵynyń baspasóz qyzmeti.

Ótinish berý Ulttyq testileý ortalyǵynyń app.testcenter.kz saıtynda nemese UTO qosymshasy arqyly júrgiziledi. Testileýdiń ózi 11 aqpanda ótedi.

Testileý 3 bólimnen turady:

1. qazaq tili boıynsha test (qazaq tilinde) — 30 tapsyrma, shekti ball — 15;
2. Qazaqstan Respýblıkasy Konstıtýtsııasynyń negizderi boıynsha test (qazaq nemese orys tilinde) — 40 tapsyrma, shekti ball — 20;
3. Qazaqstan tarıhy boıynsha test (qazaq nemese orys tilinde) — 30 tapsyrma, shekti ball — 15.

— Eń joǵary ball — 100, shekti ball — 50. Testileý ýaqyty — 2 saǵat 10 mınýt. Múmkindigi shekteýli (múgedektigi bar) tulǵalarǵa testileý tapsyrý úshin qosymsha 30 mınýt beriledi. Testileýge qatysý quny — 14 693 tg, — delingen habarlamada.

Daıyndyǵyn jaqsartýdy qalaıtyn úmitkerler úshin aqyly (app.testcenter.kz saıtynda «Baıqaý synaǵy» bóliminde — 3355 tg.) baıqaý synaǵy usynylǵan.

Budan buryn bıyl ETS-pen ulttyq testileý júıesin reformalaý jobasy iske qosylatynyn jazǵan edik.