Azamattyq alý: Memlekettik tildi qarapaıym deńgeıde bilý talaby
ASTANA. KAZINFORM – Qazaqstan azamattyǵyn alýǵa nıetti adamdar úshin ótken jyldyń sońynda arnaıy test ázirlendi. Onda qandaı suraqtar bolady? Testileý qaı kezderi uıymdastyrylady? Shekti ball qandaı? Kazinform agenttigi osy jáne ózge de saýaldarǵa jaýap usynady.
Memleket basshysy 2024 jylǵy 16 mamyrda «QR keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» Zańyna qol qoıdy.
Zańǵa sáıkes Ǵylym jáne joǵary bilim mınıstrligi «Qazaqstan Respýblıkasynyń azamattyǵyna qabyldaý nemese azamattyǵyn qalpyna keltirý kezinde memlekettik tildi qarapaıym deńgeıde, Qazaqstan Respýblıkasy Konstıtýtsııasynyń negizderin, sondaı-aq Qazaqstan tarıhyn bilý kólemin bekitý týraly» buıryq jobasyn ázirlep, 2024 jylǵy 8 qazanda (№479) bekitti.
Memlekettik tildi bilý deńgeıi qalaı anyqtalady?
Buıryqta «memlekettik tildi qarapaıym deńgeıde bilý» degen tirkes bar. Biz Ǵylym jáne joǵary bilim mınıstrliginiń Til saıasaty komıtetine suraý salyp, onyń naqty qandaı meje ekenin anyqtadyq.
— Testileý boıynsha eń joǵary ball sany – 100, onyń ishinde qazaq tili boıynsha – 60 ball, QR Konstıtýtsııasynyń negizderi boıynsha – 15 ball, Qazaqstan tarıhy boıynsha – 25 ball. «Memlekettik tildi qarapaıym deńgeıde bilý» talaby test tapsyrýshy berilgen 60 baldan kemi 36 ball alý kerek degendi bildiredi. Onyń ishinde tyńdalym bóligi boıynsha keminde 12 ball, oqylym bóligi boıynsha keminde 24 ball jınaýy tıis, - delingen habarlamada.
Sondaı-aq, azamattyq alýshylar ǵalamtordan jıi izdeıtin saýaldarǵa atalǵan vedomstvo málimetteri negizinde jaýaptar daıyndadyq:
Shekti ball qansha?
Testileý boıynsha shekti ball mólsheri – 100-den 60 ball.
Testileý qashan ótedi?
Ulttyq testileý ortalyǵy testileýdi toqsanyna bir ret ótkizedi. Syn alý mereke jáne demalys kúnderinde uıymdastyrylmaıdy. Ulttyq testileý ortalyǵy testileý ótkizý merzimderi (testileýdi ótkizý orny, kúni jáne ýaqyty) týraly aqparatty bir apta buryn testilenýshiniń jeke kabınetinde (www.app.testcenter.kz) ornalastyrady.
Qaı tilderde tapsyrýǵa bolady?
Qazaq tilinen test qazaq tilinde ǵana, al Konstıtýtsııa negizderi men Qazaqstan tarıhy boıynsha testileý qazaq nemese orys tilderinde ótedi.
Qansha ýaqyt beriledi?
Testileýge 2 saǵat 10 mınýt ýaqyt beriledi. Múmkindigi shekteýli adamdarǵa testileý úshin qosymsha 30 mınýt beriledi.
Múgedektigi bar jandarǵa qosymsha qujat tapsyrý kerek pe?
Múgedektigi bar adamdar ótinish bergen kezde múgedektikti belgileý týraly qujattyń qazaq nemese orys tilindegi notarıaldy kýálandyrylǵan aýdarmasyn tapsyrýy kerek.
Testileý kimderge aqyly?
Sheteldik azamattar testini aqyly túrde tapsyrady, testileý qorytyndysy boıynsha shekti baldy eńsergende elektrondy sertıfıkat beriledi.
Testileýden kimder bosatylady?
«Qazaqstan Respýblıkasynyń azamattyǵyna qabyldaýdyń ońaılatylǵan tártibi belgilenetin adamdar úshin kásipterdiń tizbesin jáne olarǵa qoıylatyn talaptardy bekitý týraly» Qazaqstan Respýblıkasy Prezıdentiniń 2005 jylǵy 6 maýsymdaǵy №1587 Jarlyǵymen bekitilgen tizbe boıynsha tıisti kásipterge ıe jáne talaptarǵa saı keletin adamdar sondaı-aq kámeletke tolmaǵandar, áreketke qabiletsiz adamdar, Qazaqstan Respýblıkasyna sińirgen aıryqsha eńbegi bar adamdar, etnostyq qazaqtar, Qazaqstan Respýblıkasy ratıfıkatsııalaǵan halyqaralyq sharttar negizinde jeńildetilgen tártippen Qazaqstan Respýblıkasynyń azamattyǵyn alǵysy keletin adamdar testileýden bosatylady.
Testileýdi ótkizýge respýblıkalyq bıýdjetten qarjy qarastyrylmaǵan.
Aıta keteıik, 2024 jyly 20 myńdaı adam el azamattyǵynan bas tartty.
Ótken jyly Qazaqstan azamattyǵyn alýshylar sany 25 paıyz azaıdy.
Sondaı-aq byltyr elimizde qos azamattyǵy bar 700-ge jýyq adam anyqtaldy.