Azamattarymyz syrtqy aqparattyq keńistiktiń yqpalyna túsip qalyp jatyr - Nurtóre Júsip

ASTANA. QazAqparat – Geosaıası jaǵdaı shıelenisken qazirgi ýaqytta ıdeologııalyq shebimizdi nyǵaıtý mańyzdy. Bul týraly senator Nurtóre Júsip málim etti, dep habarlaıdy QazAqparat tilshisi.

«Qazaqstan Prezıdenti óziniń «Jańa qazaqstan: jańarý men jańǵyrý joly» atty Qazaqstan halqyna joldaýynda buqaralyq aqparat quraldarynyń básekege qabiletin arttyrýǵa jáne azamattyq qoǵam ınstıtýttarynyń rólin nyǵaıtýǵa qatysty birqatar tapsyrma berdi. Ózderińizge belgili, geosaıası shıelenisken qazirgi ýaqytta ıdelogııalyq shebimizdi nyǵaıtý mańyzdy bolyp otyr. Aqparattyq keńistikte ár taraptan ashyq, ishki - syrtqy máselelerge qatysty túrli aqparattar erkin tarap jatyr. Azamattarymyz (áserese shekaralyq óńirlerdegi) syrtqy aqparattyq keńistiktiń yqpalyna túsip qalyp jatqan jaǵdaılar da bar», - dedi N. Júsip Senatta «Buqaralyq aqparat quraldary men áleýmettik jelilerdiń memlekettik ıdeologııany qalyptastyrýdaǵy orny» taqyrybynda ótken jıynda.

Osy oraıda ol 2021 jyly «Jahandaný dáýirinde ulttyq qundylyqtardy dáripteý – keshendi jańǵyrýdyń negizi» taqyrybynda, 2022 jyly «Jastar jáne jańǵyrý» taqyrybynda keń kólemde parlamenttik tyńdaý ótkenin eske saldy.

«Sol parlamenttik tyńdaýlardyń nátıjesi boıynsha memlekettik organdarǵa joldanǵan usynymnyń ishinde osy ulttyq ıdeologııany nyǵaıtý baǵytynda birqatar tapsyrma boldy. Búgin de osy baǵytta elimizdegi aqparattyq ıdeologııany kúsheıtý, onyń tıimdiligin arttyrý boıynsha jańasha usynystardy qarastyrý mańyzdy dep bilemiz», - dedi Nurtóre Júsip.

Óz kezeginde QR Aqparat jáne qoǵamdyq damý mınıstri Darhan Qydyráli aqparattyq ımmýnıtetti kúsheıtý jaıynda aıtyp berdi.

«Kóptegen erejelerdi ózgertemiz. Jalpy, buqaralyq aqparat quraldaryn qarjylandyrý tetikteri ózgeredi, ıaǵnı sýbsıdııalaý, grant berý eskeriledi. Atap aıtqanda, aqparattyq ımmýnıtetimizdi kúsheıtýdi josparlap otyrmyz. Otandyq kabeldik júıege grant bólý sııaqty jobalar taıaý arada júzege asady», - dedi D. Qydyráli.

Sonymen qatar mınıstr aqparattyq qaýipsizdik máselesine toqtaldy.

«Aqparattyq qaýipsizdikti nyǵaıtý baǵytynda tıisti is-qımyl eskerilgen. Bul baǵytta kún saıyn monıtorıng júrgizemiz. Osy oraıda qaýipti aqparattar sot úkimimen buǵattalady nemese zańnama aıasynda tosqaýyl qoıylady. Munymen qosa, bul protseste sarapshylardyń jumysy qamtylǵan. Budan bólek, shekaralyq óńirlerge toqtalsaq, bul baǵytta da ishki ımmýnıtetti nyǵaıtý mańyzdy. Bul turǵyda memlekettik tildi qoldaný aıasy keńeıtiledi», - dedi vedomstvo basshysy.

Osy oraıda D. Qydyráli Qazaqstan aýmaǵynda basqa elderdiń saıasatyn nasıhattaýǵa jol bermeý qadaǵalaýda turǵanyn aıtty.