Azamattarymyz jańa Konstıtýtsııa jobasyn qoldaǵan jaǵdaıda elimizdiń turaqty damýyna jol ashatyn saıası júıe qalyptasady – Toqaev
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda Konstıtýtsııa mátinimen jumys istegen barsha azamatqa alǵys aıtty.
– Aýqymy jaǵynan da, quramyndaǵy mamandardyń kásibı deńgeıi turǵysynan alyp qarasaq ta teńdesi joq Komıssııa óte kóp jumys atqardy. Myńdaǵan usynysty júıelep, retke keltirý – ońaı sharýa emes. Men osy sátti paıdalanyp, Halyq Konstıtýtsııasynyń mátinimen jumys istegen barsha azamatqa taǵy da zor alǵys aıtamyn. Sondaı-aq el taǵdyryna tikeleı áser etetin máselege beıjaı qaramaı, óz usynystaryn joldaǵan adamdarǵa shynaıy rızashylyǵymdy bildiremin. Sarapshylar barlyq negizgi másele boıynsha ortaq mámilege kelgen soń ǵana jańa Konstıtýtsııanyń sońǵy jobasy buqaralyq aqparat quraldarynda jarııalanyp, respýblıkalyq referendýmǵa shyǵaryldy. Endi aldaǵy jeksenbide halqymyz daýys beredi. Bul referendýmnyń Qazaqstan tarıhyndaǵy orny erekshe bolatyny sózsiz, - dedi Prezıdent.
Memleket basshysy Bas prokýrordyń ókilettilik merzimin shekteıtin erejeler Konstıtýtsııa jobasyndaǵy jańashyldyq bolatynyn atap ótti. Negizgi zań jobasyna sáıkes, bir adam atalǵan qyzmetterge bir retten artyq taǵaıyndalmaıdy. Memlekettegi joǵary laýazymdy tulǵalarynyń ókilettigin bir merzimmen shekteý – buryn-sońdy bolmaǵan saıası jańashyldyq.
– Azamattarymyz Konstıtýtsııa jobasyn qoldaǵan jaǵdaıda Qazaqstanda jańa, anaǵurlym tıimdi, ıaǵnı, elimizdiń uzaqmerzimdi turaqty damýyna jol ashatyn saıası júıe qalyptasady. Konstıtýtsııalyq Sot tóraǵasy men sýdıalarynyń, Joǵary Sot tóraǵasynyń jáne Bas prokýrordyń ókilettilik merzimin shekteıtin erejeler Konstıtýtsııa jobasyndaǵy jańashyldyq boldy. Negizgi zań jobasyna sáıkes, bir adam atalǵan qyzmetterge bir retten artyq taǵaıyndalmaıdy. Memlekettegi joǵary laýazymdy tulǵalarynyń ókilettigin bir merzimmen shekteý – buryn-sońdy bolmaǵan saıası jańashyldyq. Sonymen qatar Quryltaıdyń Konstıtýtsııalyq Sot pen Joǵarǵy Sot sýdıalaryn qol suǵylmaý kepildiginen aıyrý, Premer-mınıstrdi taǵaıyndaýǵa kelisim berý quzyreti saqtalady. Osylaısha, tejemelik jáne tepe-teńdik júıesi nyǵaıyp, onyń tıimdiligi arta túsedi. Endi bir palataly Parlamentte Prezıdent kvotasy bolmaıdy. Ony saqtaýǵa da bolar edi. Konstıtýtsııalyq reforma jóninde kelip túsken usynystardyń qatarynda osy kvotany kúshinde qaldyrý týraly da kóp aıtyldy. Biraq depýtattar eshqandaı artyqshylyqsyz biryńǵaı ereje boıynsha saılanýǵa tıis dep sanaımyn. Prezıdenttiń jaqyn týystarynyń memlekettik saıası qyzmetshi laýazymyn atqarýyna, tipti, kvazımemlekettik sektor sýbektileriniń basshysy bolýyna tyıym salatyn norma aıryqsha mánge ıe. Bul ereje bıliktegi otbasylyq júıege jáne onyń bir qolǵa shoǵyrlanýyna tosqaýyl qoıady. Keıbir yqpaldy adamdar, basqasha aıtqanda «sur kardınaldar» nemese «saıasat sahnasynyń syrtyndaǵy oıynshylar» memlekettik ınstıtýttardy almastyrmaýy kerek. Bul tájirıbe túbegeıli joıyldy, - dedi Memleket basshysy.
Jańa Konstıtýtsııa — jastarǵa ómirde baǵyt-baǵdar silteıtin temirqazyq ispettes.
