«Azamattarǵa arnalǵan úkimet» UQK qyzmetkerleri Shymkenttegi HQO-ǵa júrgizgen tintýge túsinik berdi

«Azamattarǵa arnalǵan úkimet» memlekettik korporatsııasy» KEAQ basqarma tóraǵasy Súıenish Ábdildın Shymkent qalasyndaǵy HQO-ǵa júrgizilgen tintýge qatysty túsinik berdi, dep habarlaıdy QazAqparat tilshisi.

Onyń aıtýynsha, máseleniń mán-jaıyn anyqtaý úshin Ulttyq qaýipsizdik komıtetine hat joldanǵan. Súıenish Ábdildın atap ótkendeı, ázirge jaýap joq.

Sondaı-aq, ol bıyl naýryzda «Azamattarǵa arnalǵan úkimettiń» qyzmetkerleri ustaldy degen aqparatqa qatysty jaýap berdi.

«Eshkim ustalǵan joq», - dedi Súıenish Ábdildın Májilistiń jalpy otyrysynan keıin BAQ ókilderiniń saýalyna jaýap bere otyryp.

Memlekettik korporatsııa basshysy sol kúni Qarjylyq monıtorıng agenttigi qyzmetkerleriniń suraqtaryna jaýap bergenin málimdedi. Olardyń qandaı saýal qoıǵanyn agenttikten anyqtaý qajettigin aıtty. Ol jaýap alýǵa kýáger retinde qatysqan.

Qazirgi ýaqytta «Azamattarǵa arnalǵan úkimet» shtattyq rejımde jumys istep tur.

Eske sala ketsek, atalǵan oqıǵanyń vıdeosy birneshe kún buryn áleýmettik jelide qyzý talqyǵa túsken edi. Onda kúsh qurylymdarynyń qyzmetkerleri esikti syndyryp, kabınetten eshkimdi tappaı shyǵyp ketedi.