Azamattarǵa arnalǵan úkimet arqyly ótetin mámileler qarjylyq monıtorıng baqylaýyna beriledi

ASTANA. KAZINFORM – Memleket uıaly baılanys teńgerimin tolyqtyrý operatsııalaryn qarjylyq monıtorıng baqylaýyna almaqshy. Májiliste osy normalardy zańnamaǵa engizetin qujat birinshi oqylymda qaralyp jatyr.

Qujatty tanystyrǵan Qarjylyq monıtorıng agenttigi tóraǵasynyń orynbasary Jeńis Elemesov kásibı jylystatýshylar zań jetilgen saıyn ákkilenip bara jatqanyn aıtty.

- Zań jobasy agenttikke qylmystyq kiristerdi jylystatý, zańsyz qyzmetti qarjylandyrý táýekelderin anyqtaý turǵysynan kommertsııalyq emes uıymdardyń kúdikti operatsııalaryn taldap, monıtorıng júrgizý mindettemesin júkteıdi, - dedi ol.

Aıtýynsha, bul agenttikke qarjylyq qylmystardyń jolyn josparlaý kezeńinde-aq kesýge múmkindik beredi

- Budan basqa uıaly baılanys operatorlary men Azamattarǵa arnalǵan úkimet qarjylyq monıtorıngtiń jańa sýbektileri bolady. Uıaly baılanys operatorlary mobıldi teńgerimdi tolyqtyrý týraly, al Azamattarǵa arnalǵan úkimet notarıýstardaǵy mámilelerge uqsas jyljymaıtyn múlik pen 50 mln teńgeden astam somaǵa jasalatyn mámileler týraly aqparat beretin bolady. Bul normalar kúdikti operatsııalardy tıimdirek anyqtap, jolyn kesýge yqpal etedi, - dedi Jeńis Elemesov.

Eske salsaq, Májilis aqpan aıynda ǵana aqshany jylystatýǵa qarsy kúres týraly zań qabyldaǵan bolatyn.